Тринаесет чувари во малолетничкиот центар во Милано беа уапсени по наредба на обвинител во понеделникот, бидејќи се обвинети за извршување на серија напади врз малолетни затвореници и за тортура на многумина во затворската институција.

Апсењата во малолетничкиот затвор Чезаре Бекарија беа извршени како дел од истрагата за напади извршени меѓу 2022 година и оваа година, објасни италијанската полиција во соопштението за печатот.

Обвинетите се товарат дека учествувале во „тортура“, „злоупотреба на должноста“, „соучесништво во напади врз малолетници“ и во еден случај, „обид за сексуално насилство“ – силување на затвореник.

Службениците на истрагата можеа да ги идентификуваат наводните сторители благодарение на прислушувањето, снимките од затворен надзор на притворскиот центар, како и сведочењето на поранешните затвореници, се вели во соопштението за печатот.

Италијанските затвори се соочуваат со хронични проблеми, особено пренатрупаност и недоволно финансирање. Во јануари тие држеле 60.300 лица, додека нивниот номинален капацитет не надминува 47.300 места, според телото што го надгледува затворскиот систем.

Притворот во кој работеле дванаесет од тринаесетте приведени има околу 50 чувари и 20 години е без директор.

Синдикатот на затворскиот персонал изрази „ужас“ од обвинувањата.

„Знаеме дека затворските службеници ширум Италија работат со професионализам и хуманост“, но „имаме доверба во италијанското правосудство да го расветли случајот што е можно поскоро“, велат од синдикатот SAPPE.

Ова е „болен“ случај, „црна страница“ во историјата на италијанскиот затворски систем, коментираше на прес-конференција шефот на обвинителството во Милано, Марчело Виола.

Според обвинителството, полицајците им ставиле лисици на жртвите за да не можат да се спротивстават и ги претепале на тој начин што не оставале траги.

„Сметаа дека нивните постапки се оправдани и дидактички“ за справување со „недоличното однесување на затворениците“, но во секој случај употребија „незаконско насилство“, нагласи од своја страна обвинителката Летиција Манела.

Иако – релативно – мал, популацијата на малолетнички притвор во Италија рапидно расте во последниве години. Според Антигона, организација која ги брани правата на затворениците, на крајот на февруари 532 малолетници биле затворени во 17 центри за притвор, од 381 во 2022 година.