Снимал видеа во напуштено италијанско село, паднал од балкон – Детали за смртта на грчкиот инфлуенсер Tzane

Детали

понеделник, 18 март 2024

Заминал да снима видео во една од последните напуштени грчки населби во Италија, но искачувањето во напуштените и небезбедни објекти го чинело живот – Што знаме за прераната смрт на грчкиот инфлуенсер Tzane?

Речиси во сите светски и балкански медиуми е објавена веста за трагичната смрт на младиот грчки тиктокер и инлфуенсер Џорџи Џанелиџе (23), кој на социјалните мрежи беше познат како Tzane.

Со тага и неверување, неговите обожаватели се простуваат од него на профилите на социјалните мрежи, откако беше пренесено дека на 13-ти март тој доживеал несреќа, при што го загубил животот.

Во грчките медиуми, пак, се пренесуваат детали за неговата смрт и за тоа како последното патување во Италија било кобно за него.

Tzane заедно со уште неколку другари бил во посета на напуштената италијанска населба Рогуди Векио и се верува дека паднал од балкон без ограда.

Според сведоштвата на неговите пријатели, Tzane заедно со своите пријатели сакал да сними видео за социјалните мрежи, но искачувањето на старите и разрушени објекти било кобно за него.

Селото Рогуди Векио во Калабриа е напуштена населба, која во минатото била дом на една од последните заедници што зборувале на грчки јазик, и се вели дека тоа се „грчки урнатини“ среде Италија.

Селото се наоѓа во Апенинските Планини сместени на самиот „врв“ на штиклата на Апенинскиот Полуостров.

Таму сѐ уште има населби во кои се зборува т.н. греко или грчки јазик со италијански акцент, претежно во гратчето Рогуди Нуово, кое е формирано од некогашните жители на гратчето Рогуди Векио.

Рогуди Векио во втората половина од 18-тиот век бил погоден од силен земјотрес, а потоа во повеќе наврати имало лизгања на земјиштето и поплави, заради што во 1971-ва година конечно целото население било раселено.

Денес е дозволено напуштениот град да се посети и да се „ѕирне“ во градбите за да се види што останало заборавено во времето, но очигледно не е безбедно да се влегува во напуштените објекти или да се истражува од балконите, а доказ за тоа е и прераната смрт на младиот тиктокер.

Б. С. Б. | Црнобело