„Ние сме едно семејство и затоа треба да разговараме. Неформални комуникации постојат и сега со коалицијата ‘Вреди’. Но, за нешто да биде посериозно, прво треба ние во рамките на коалицијата ‘Твоја Македонија’ да добиеме одобрување за ВМРО-ДПМНЕ да ги води тие преговори и разговори. Па, потоа да одбереме луѓе кои преговараат, нешто што треба да помине и кај органите на партијата“, најави вчера лидерот на ВМРО-ДПМНЕ
На одржана средба со претседателите на партиите кои се во состав на коалицијата „Твоја македонија“ добивме поддршка за отпочнување преговори за состав на идната влада.
Ова денеска на својот фејсбук-профил го објави лидерот на ВМРО-ДПМНЕ, Христијан Мицкоски, со информација за одржана средба со претседателите на коалициските партии, на која, како што додаде, било констатирано дека коалицијата остварила успешен и историски резултат, кој според него, создава и одговорност за реализирање на очекувањата.
„Според заклучокот на состанокот, разговорите треба да се водат на основа на постулати за забрзан економски развој на Македонија, силна борба против криминалот и корупцијата и европските ингеренции врз база на принципи и вредности“,
напиша Мицкоски.
Оваа средба со коалициските претставници на партиите Мицкоски ја најави вчеравечер гостувајќи во емисија на на ТВ Канал 5, каде што рече дека целта на ваков состанок е во насока и да ги чуе и нивните размислувања за идната коалициска влада. Сепак, посочи и дека според изборните резултати, извесно дека коалицијата „Вреди“ ќе биде нивен коалициски партнер.
„Ние сме едно семејство и затоа треба да разговараме. Неформални комуникации постојат и сега со коалицијата ‘Вреди’. Но, за нешто да биде посериозно, прво треба ние во рамките на коалицијата ‘Твоја Македонија’ да добиеме одобрување за ВМРО-ДПМНЕ да ги води тие преговори и разговори. Па, потоа да одбереме луѓе кои преговараат, нешто што треба да помине и кај органите на партијата“,
рече лидерот на ВМРО-ДПМНЕ.
Мицкоски нагласи дека приоритет во следниот период ќе им биде да консолидираат 61 пратеник, па потоа да влезат во преговори и разговори за коалицирање.
„Пред да почнеме да водиме посериозни разговори, ВМРО-ДПМНЕ и коалицијата ‘Твоја Македонија’ треба да консолидираат 61 пратеник. Дали ќе успееме, не знам. Дали ќе се обидеме да успееме, ќе дадеме се од себе. Има најави од голем број нови членови во парламентот кои се подготвени да ги поддржуваат политиките на идната влада предводена од ВМРО-ДПМНЕ“,
вели тој.
Неколкупати повтори дека до 28 мај (конституирање на Собранието, н.з.) е можно да консолидираат 61 пратеник, па така заедно со „Вреди“, додаде тој, би имале 74 или 75 пратеници.