„Свесен сум дека ова ќе биде тежок и долг процес, но знам дека клучниот проблем не се законите, туку луѓето што ги спроведуваат законите. Затоа сите оние што нема да го поминат ова прочистување нема да смеат да ја делат правдата или да учествуваат во политиката. Време е силно да удриме врз криминалците бидејќи тие ќе ги уништат нашата држава и општество“, пишува во програмата на актуелниот претседател и кандидат за втор мандат на функцијата шеф на државата
Изборниот штаб на актуелниот претседател на државата и кандидат за втор мандат на функцијата поддржан од СДСМ и „Коалицијата за европска иднина“, Стево Пендаровски, денеска ја објави својата изборна програма. Во неа тој, како што се наведува во соопштението, ги адресира клучните потреби на сите категории граѓани и нуди решенија за сите предизвици пред кои е исправено македонското општество.
Во програмата, која е на 28 страници, Пендаровски кратко се осврнува на резултатите и постигнатото во својот досегашен петгодишен мандат, за во продолжени да ги изложи главните цели кои ќе му бидат во фокусот ако и по вторпат ја освои довербата на граѓаните.
„Сите предизвици со кои се соочивме и со кои се соочуваме ме убедија дека единствено доколку имаме јасна визија, прецизна стратегија и граѓанско единство можеме да ја оствариме нашата цел да живееме во уредена држава којашто почива врз принципот на владеење на правото, економски напредува, обезбедува социјална правда и целосна еднаквост на сите наши граѓани без оглед на потеклото во нашето мултикултурно македонско општество. Зад себе немам ниту една корупциска афера или пример на користење на функцијата за остварување на лични интереси. Затоа на претстојните избори ја барам вашата поддршка и доверба за втор мандат. Имам визија и енергија да продолжам со борбата за благосостојбата на нашите граѓани и на нашата држава“
вели Пендаровски во своето воведно обраќање во програмата.
Инаку, неговата изборна програма е составена, од како што е наведено, пет клучни столба.
- Глас на граѓаните – заштитник на правата и слободите;
- Промотор на младите ранливите и маргинализираните заедници;
- Заштитник на демократијата и соработката меѓу заедниците во македонското општество;
- Борба за правна држава ослободена од канџите на организираниот криминал и корупција;
- Европска интеграција како двигател на целосната трансформација.
Независност од партиите и посветеност на граѓаните, формирање советодавно тело за формулирање ефективни демографски политики, зголемена грижа за нашата дијаспора, продолжување на корективната улога и употреба на правото на вето на закони кои се спротивни од интересите на граѓаните и посветеност на унапредување на соработката со институциите на ЕУ, се само дел од заложбите на Пендаровски кои тој ги најавува ако и по втор пат стане претседател на државата.
Една од заложбите која со големи букви е наведена во програмата на Пендаровски е таа дека во вториот мандат ќе биде предводник на иницијативата за целосен ветинг во правосудните институции и во политиката.
„Мораме преку соодветни посебни закони да извршиме проверка на сите судии, обвинители, високи функционери во правосудството, но и на сите политичари“,
наведува Пендаровски во програмата.
Проверката, како што е наведено, ќе се однесува на потеклото на имотот на функционерите и на членовите на нивните семејства, како и на оние кои со блиски семејни односи или имале поранешни деловни односи.
Проверката, се вели во програмата, мора да биде длабинска, а процесот целосно транспарентен.
За да се обезбеди доверба во процесот, Пендаровски во програмата пишува дека процесот треба да биде спроведен со поддршка на сите релевантни политички структури, а во неговото спроведување да учествуваат покрај домашни и странски експерти.
Резултатите од проверката, според Пендаровски ќе бидат еден од клучните услови за извршување на политичка или правосудна функција.
„Свесен сум дека ова ќе биде тежок и долг процес, но знам дека клучниот проблем не се законите, туку луѓето кои ги спроведуваат законите. Затоа сите оние кои нема да го поминат ова прочистување нема да смеат да ја делат правдата или да учествуваат во политиката. Време е силно да удриме врз криминалците бидејќи тие ќе ја уништат нашата држава и општество“,
пишува во програмата на претседателскиот кандидат Пендаровски.