Министерот за здравство Демири со законски измени ќе го подобрува опфатот со задолжителна имунизација, доколку имаме предвид дека според последните податоци, 10.000 деца не се вакцинирани со ди-те-пер, додека третина од нив немаат примено МРП. Според Демири, јавноста би требала да знае за оние родители кои свесно го прават тоа, загрозувајќи го здравјето на своето дете, нивните имиња да бидат јавно соопштени, затоа што го изложуваат своето дете на болести.
„Ќе предложам законски нормативи, да не можат да одат во училиште без да бидат вакцинирани. Тука ќе се побара и тоа ќе биде еден од условите и потоа сигурно ќе има некоја подзаконска норматива. Тоа останува на правниците. Ако родителот на некое дете не дозволува вакцинација, да има консеквенци, зошто родителот не го вакцинирал детето“, изјава Илир Демири, министер за здравство.
Воедно, невакцинирани лица да не може да се вработат во јавното здравство. Во моментов за мене како инфектолог, вели Демири, „покрај големата кашлица и морбилите кои се веќе присутни во регионот, многу позагрижувачки е фактот за пропуштени доза за полиомиелит, заболување кое нема специфичен третман, со висока инвалидност и смртност кај деца“.
Според Демири, повеќе од два милиона дози на вакцини на Западен Балкан и во дел од Европската Унија се пропуштени за полиомиелит. Ризикот е голем доколку се знае дека низ Македонија минуваат многу патишта, а ендемски зони се Авганистан и Пакистан.
Веќе од следниот месец, Календарот за редовна имунизација ќе биде проширен со деветовалентна ХПВ вакцина. Вакцината ќе биде достапна и за младите момчиња.
„Досега се користеше четиривалентната вакцина, а со ова осовременување на календарот од оваа година ќе ја користиме деветовалентаната ХПВ вакцина, која обезбедува заштита и кон дополнителните пет серотипови на ХПВ вирусот и тоа покрај четири серотипови против кои и досега вакциниравме 6, 11, 16 и 18, оваа вакцина ќе заштитува и од ХПВ серотиповите 31, 33, 45, 52, 58“, изјава проф. д- р Александра Грозданова, национален координатор за имунизација.
Годишно во земјава се евидентирааат околу 150 нови случаи со рак на грлото на матката, а околу 60 пациенти годишно го губат својот живот поради состојби поврзани со ова заболување. Новата деветовалентна ХПВ вакцина е безбедна и делотворна и дополнително ќе ја намали инциденцата на ХПВ инфекцијата, како и на малигните заболувања поврзани со ХПВ во споредба со првичната читиривалентна ХПВ вакцина, забележа претставничката на УНИЦЕФ, Патриција ди Џовани.
Нина Стефанова