Аналитичарите од Волстрит се сè позагрижени дека американската економија би можела да се упати кон сценарио за „стагфлација“ во стилот на 1970-тите, поради неодамнешните знаци на „тврдоглаво“ висока инфлација и заладување на економијата.
Серијата извештаи за инфлација во првите три месеци од 2024 година беа над проценетите, што ги поттикна стравувањата дека инфлацијата ќе биде потешко да се надмине отколку што претходно се веруваше.
Згора на тоа, економскиот раст неочекувано ослабе во текот на првиот квартал, растејќи со годишна стапка од само 1,6 отсто, што е најбавна стапка од 2022 година.
„Ова беше најлошиот извештај во две области: побавен раст од очекуваниот, повисока од очекуваната инфлација. Најголемата пречка е забрзувањето на базичната инфлација, особено услужниот сектор, кој расте над пет проценти годишно“, рече Дејвид Донабедијан, главен инвестициски директор на американската консултантска компанија CIBC Private Wealth, коментирајќи ги најновите податоци за БДП на САД.
Таа комбинација на економска стагнација и висока инфлација е она што е познато како „стагфлација“, што се смета за најлош исход за Федералните резерви, наведуваат американските медиуми.
Што е стагфлација?
Феноменот ја погоди американската економија во 1970-тите и раните 1980-ти, бидејќи зголемените цени на нафтата, зголемената невработеност и лесната монетарна политика го турнаа индексот на потрошувачките цени на 14,8 проценти во 1980 година, принудувајќи ги креаторите на политиката на Федералните резерви да ги зголемат каматните стапки на речиси 20 проценти таа година.
Стравувањата од стагфлација се зголемија во 2022 година, кога ФЕД почна агресивно да ги зголемува каматните стапки за да ја смири инфлацијата, но тие во голема мера исчезнаа минатата година откако ценовните притисоци се намалија без значително влијание врз економскиот раст.
Сепак, има некои неодамнешни знаци дека инфлацијата е поцврста од очекуваното, иако економскиот раст забавува.
Додека инфлацијата значително падна од врвот од 9,1 отсто, напредокот во голема мера е умерен од летото. Последните владини податоци покажуваат дека индексот на потрошувачки цени се зголемил за 3,5 отсто во март, што е највисоко ниво во последните шест месеци.