Во вторник, на 30 ти април во во 12 часот во кафе бар „Порта џез“ во Битола во организација на Урбана Агенда на МКЦ-Битола – поддршка на независната културна сцена ќе се отвори изложбата на уметничка фотографија „Импровизации“ на Глигор Кондовски.
Изложбата е посветена на мултимедијалниот македонски уметник, продуцент и автор Мирко Попов (1972 – 2024).
Фотографиите се сценски фотографии во вид на комбинирано спојување помеѓу визуелна и аудитивна (музичка) импровизација специфична за џез музиката. Фотографии направени од фестивалите: ПМГ Рекордингс и Крај Вардарот Џез.
Во својот најнов фотографски опус, реномираниот режисер и фотограф Глигор Кондовски приоѓа апстрактно. Изнаоѓајки визуелни решенија надвор од границите на дотогашните индивидуални и глобални фотографски тенденции, тој ги поместува своите внатрешни граници и ја ослободува вештата рака. Во таа целосна слобода и предаденост во самиот чин на фотографирање, флуидноста на уметничкиот момент го носи во најсовремен фотографски израз. Фотографијата не е повеќе фотографија, таа е цртеж и слика. Преодот на ова високо фотографско ниво е свесно обмислен, а не просто-интуитивен, иако неговиот фотографски инстинкт никогаш не може да го излаже.
Проектот Урбана Агенда е поддржан од Швајцарската Амбасада во Скопје.