Третина од светската популација верува дека климатските промени се еден од најголемите глобални предизвици, но има многу помалку оние кои веруваат дека ова прашање треба да биде приоритет за владите на нивните земји, покажува истражувањето објавено денеска.
Климатските промени се сметаат од 33 отсто од светското население за една од трите најголеми глобални закани, по војната и другите конфликти, и сиромаштијата и гладот - според Индексот на перцепција на демократијата, во чие истражување беа анкетирани од февруари до април речиси 63.000 луѓе во 53 земји каде што живее 75 отсто од населението во светот.
Сепак, само 14 отсто од испитаниците рекле дека борбата против климатските промени треба да биде меѓу трите врвни приоритети на нивната влада.
Од 2022 година, повеќе Европејци велат дека нивните влади треба да се фокусираат на намалување на имиграцијата и помалку да дадат приоритет на борбата против климатските промени.
Оваа година, за прв пат, намалувањето на имиграцијата е поважно од борбата против климатските промени за повеќето Европејци.
„Во многу европски земји има нагло зголемување на уделот на луѓе кои велат дека намалувањето на имиграцијата треба да биде главен приоритет на владата. Во исто време, истите овие земји забележуваат пад на уделот на луѓе кои велат дека борбата против климатските промени треба да биде главен приоритет на владата“, се наведува во истражувањето.
Во Германија, на пример, 44 отсто од испитаниците сакаат нивната влада да се фокусира на намалување на имиграцијата, а 24 отсто на борбата против климатските промени.