Астрономите открија 62 нови природни сателити кои орбитираат околу прстенестата планета Сатурн.
Пред ова откритие, Сатурн имаше 83 сателити признаени од Меѓународната астрономска унија. Сега има неверојатни 145. Откритието означува уште една пресвртница за Сатурн. Планетата стана прва во вселената за која е познато дека околу неа орбитираат повеќе од 100 сателити.
Новите сателити беа откриени од тим предводен од Едвард Ештон, постдокторски соработник во Институтот за астрономија и астрофизика Academia Sinica, кој користеше техника наречена „shift and stack“ за да ги пронајде овие помали и побледи сателити околу Сатурн.
Иако некои од сателитите биле забележани уште во 2019 година, потребно е повеќе од гледање објект блиску до планета за да се потврди дека тоа е сателит, а не астероид кој прави краток близок премин до таа планета. За да ги променат овие објекти од „сомнителни сателити“ во „потврдени сателити“ на Сатурн, астрономите морале да ги следат неколку години за да се осигураат дека секој од нив всушност орбитира околу гасниот џин.