Пешаци без сообраќајна дисциплина, 13 казнети во Гостивар во вчерашната контрола

Во рамките на континуираните активности што ги презема СВР Тетово за поголем ред и безбедноста на сообраќајот, вчера (3-ти април) во период од 10 до 16 часот спроведена е акциска контрола на пешаците и нивното однесување во сообраќајот. При контролата биле откриени и санкционирани 24 пешаци ( Тетово-11 и Гостивар-13). Најголемиот број од пешаците ги преминувале улиците надвор од обележани премини, а неколку не ја почитувале светлосната сообраќајна сигнализација.

„На сите прекршители изготвени им се поднесоци со парични глоби од 40 и 50 евра, како и покани за присуство на таканаречени сообраќајни поуки. Во акцијата, исто така, санкционирани се и 2 други видови на сообраќајни прекршоци.“, извести полицијата.

СВР Тетово го повторува апелот до пешаците да внимаваат кога и каде ги преминуваат улиците и како се движат по улици на кои нема обликувани тротоари, а возачите секогаш и секаде да им даваат предност, односно да ги пропуштаат пешаците, со што и едните и другите ќе придонесат за нивната и за безбедноста на другите учесници во сообраќајот.