Портпаролот на Кремљ, Дмитриј Песков, му се закани на Западот со можна одмазда доколку се обиде да ги заплени руските средства.
Во САД, Обединетото Кралство и во Европската унија се расправа за можноста за запленети руски имоти, а некои бараат парите да се искористат за финансирање помош – па дури и оружје – за Украина.
Песков сугерираше дека Москва може да заплени странски средства во Русија доколку се преземат какви било потези за запленување на руски средства во странство.
– Разбирливо е дека Русија ќе ги користи овие правни канали и целосно ќе ги брани своите интереси – рече Песков во интервју за руската телевизија.
Тој, исто така, предупреди дека Западот би можел да ја изгуби довербата на другите странски инвеститори доколку се манипулираат руските средства.
– Сигурноста исчезнува преку ноќ поради глупава, непромислена одлука – рече Песков.
Стотици милијарди долари вредни средства на Руската Народна банка се замрзнати во ЕУ и на други места по сеопфатната инвазија на Украина на Русија во февруари 2022 година. Според сегашниот предлог на ЕУ, нема да има експропријација на основните средства, туку приходите од средствата би и биле дадени на Украина.
– Не смее да се допира руски имот, во спротивно ќе има остар одговор на западната кражба – изјави портпаролката на руското Министерство за надворешни работи, Марија Захарова, во објава на Телеграм.
– И многумина на Запад веќе го сфатија тоа. За жал, не сите – напиша таа.