Израелскиот министер за одбрана Јоав Галант му рече на секретарот за одбрана Лојд Остин во неделата дека Израел нема друг избор освен да одговори на нападот со проектили и беспилотни летала, лансирани од Иран за време на викендот.
Ова за Аксиос му го кажал американски функционер и друг извор запознаен со разговорот.
Галант му рекол на Остин во неделата во телефонскиот разговор дека Израел не може да дозволи лансирање на балистички ракети на негова територија без одговор, изјави американски официјален претставник и извор информиран за повикот.
Израел нема да прифати равенка во која Иран одговара со директен удар секогаш кога Израел напаѓа цели во Сирија, додаде Галант.
Изворите рекоа дека Остин испратил слична порака на онаа што претседателот Бајден му ја даде на Нетанјаху во саботата навечер, нагласувајќи ја потребата да се направи се што е можно за да се избегне понатамошна ескалација.
„Вие ја освоивте победата. Земете ја победата“, му рече Бајден на Нетанјаху, предупредувајќи дека САД нема да поддржат никаков израелски контранапад врз Иран.
Администрацијата на Бајден и неколку други западни земји кои се сојузници на Израел му порачаа на Нетанјаху да не брза со одмазда против Иран што може да доведе до регионална војна.
Воениот кабинет на Израел се состана во понеделникот за да разговара за можниот одговор на Израел.
На 13 април, Иран лансираше речиси 350 беспилотни летала и проектили за да го нападне Израел како одмазда за израелскиот воздушен напад на 1 април врз неговата амбасада во Сирија, во кој загинаa висок ирански генерал и други.
Повеќето беспилотни летала и проектили биле пресретнати надвор од израелскиот воздушен простор од израелски, американски, британски, француски, јордански и саудиски сили, соопштија официјални лица.