Електричниот Porsche Macan на пазарот во 2024 година
Помалиот теренец на Porsche кој нема да се придвижува од мотор со внатрешно согорување, во најмоќната верзија ќе има повеќе од 600 коњски сили и 1.000 Nm вртежен момент
Очигледно, во Porsche биле принудени да ги корегираат претходните планови според кои електричниот теренец Macan требаше да им биде достапен на купувачите од следната година, а причината се познатите проблеми со испораката на микрочипови, кои, за жал, ги расипуваат плановите на повеќето автомобилски компании.
Како и да е, помалиот теренец на Porsche кој ќе се вози само со електромотор(и) треба да им биде достапен на клиентите од 2024 година, а додека продолжуваат интензивните тестирања во Цуфенхаузен, од компанијата открија некои технички детали за нивниот втор електричен модел на нова платформа која е резултат на заедничко вложување на Porsche и Audi.
Најмоќниот електричен Macan ќе биде придвижуван од два електромотори кои ќе се комбинираат за да произведуваат повеќе од 600 коњски сили и 1.000 Nm вртежен момент. За напојувањето е одговорен батерискиот пакет со капацитет од 100 kWh, а електромоторите ќе ги придвижуваат двете оски. Покрај гореспоменатата платформа, Macan ќе се нуди и во комбинација со еден електромотор кој се наоѓа одзади и ќе биде задолжен за придвижување само на задните тркала.
Масата на автомобилот не е соопштена, но се открива дека во комбинација со два електромотори, 48 отсто од вкупната моќност ќе оди на предната оска, а 52 отсто на задната оска. Не е откриен ниту опсегот што ќе го обезбедуваат батериите на Macan (литиум-јонски), но се вели дека 25 минути ќе бидат доволни за да се наполнат од пет до 80 проценти на соодветно моќни полначи.
Познато е и дека електричниот Macan ќе има помал круг на вртење и управување преку двете оски при брзини до 80 km/h, а Porsche ќе го нуди паралелно со сегашните верзии на Macan придвижувани од мотори со внатрешно согорување.