ekran платформа за слободоумни
Утревечер во Рускиот центар во Скопје, со почеток во 19:00 часот, ќе се одржи предавање на тема Велигден: Тајна на Воскресението и руските и македонските обичаи поврзани со неговото празнување.
На предавањето ќе стане збор за суштината и за значењето на Христовото воскресение. Смртта е најголемиот непријател на човечкиот род. Таа се манифестира двојно: духовно и телесно. Со Христовото спасително дело, на целиот човечки род му е отворен патот кон воскресението. Затоа Велигден е најзначајниот христијански празник.
Во контекст на одбележувањето на овој голем ден, кај православните народи се забележуваат повеќе обичаи, кои имаат поврзаност со суштината на празникот. Некои од нив се заеднички за сите православни, а некои се карактеристични само за одредени средини. Во предавањето ќе стане збор за заедничките обичаи на македонскиот и на рускиот народ, но и за некои од руските велигденски обичаи, кои се помалку познати во Македонија.
Предавањето ќе го одржи јеромонах Атанасиј Арсоски. Тој е свештенослужител во Марковиот манастир „Св. вмч. Димитриј“, кој се наоѓа во околината на Скопје. Јеромонахот Атанасиј е одговорен и за издавачката дејност на Скопската епархија на Македонската православна црква.
