Облачно со повремени врнежи од дожд, на повисоките места од снег

Во понеделник на територијата на Македонија ќе преовладува променливо облачно време со повремени врнежи, на планините и на некои повисоки места од снег, а во пониските од дожд кој повремено ќе преминуваат во снег.

Ќе дува слаб до умерен, уште од претпладне, долж Повардарието повремено засилен ветер од северен правец. Слаб снег имаше и преку ноќта понекаде во планинските региони.

Утринските температури се движат од минус 1 до 5, додека највисоките во текот на денот соодветно ќе бидат во интервалот меѓу 1 и 9 Целзиусови степени.

Во Скопје и околината денеска ќе иде променливо облачно со услови за слаб повремен дожд, на повисоко со услови за слаб снег и со слаб северен ветер. Највиската температура ќе достигне до 9 степени.