Договор во кој приватникот треба да изгради две монтажни катни гаражи и да одвојува еден отсто од годишниот приход за државата, а граѓаните да плаќаат поскап паркинг отколку досега е на штета на јавниот интерес, вели за „Макфакс“ Зоран Лазаревски, претседател на Алијансата за јавно -приватно партнерство Ц.Р.Е.А.М., заедница за реализација европска помош.  Без двоумење, вели дека сите досегашни процедури треба да се поништат, а министерот за здравство и Владата да преземат повнимателни чекори и на нов оглас навистина да го заштитат јавниот интерес.

„Ова партнерство за мене е преседан. Не навлегувам во тоа  дали е запазена процедурата за јавно-приватни партнерство за што има конкретно пропишани постапки, има надлежни институции кои може и треба да проверат. Овде јас се прашувам кој е интересот на граѓаните, кој јавниот интерес, оти овде јавен интерес не е интересот на институцијата туку на граѓаните. Воопшто го нема ако граѓаните мораат да платат паркинг, притоа и поскап отколку досега. За да се спроведе едно јавно – приватни партнерство на право место треба да е јавниот интерес кој со физибилити студија го пропишува Владата. Јавниот интерес, односно интересот на граѓаните, не е заштитен со 50 денари за час паркирање. Можело тоа да биде барем привилегирана цена, на пример половина од сегашната, иако има начини и паркирањето да биде бесплатно за граѓаните на сметка на други услуги кои во Клиничкиот центар можат да бидат на принципот јавно-приватни партнерство кои би му носеле профит на приватникот“, вели Лазаревски.

Министерот за здравство Арбен Таравари денес објасни дека договорот со албанската компанија „Ѓока констракшн“ единствената пријавена за јавно – приватно партнерство за паркирањето во Клиничкиот центар, се уште не е потпишан. Поминати се сите постапки во Министерството за здравство, но пред да биде потпишан, треба да помине уште неколку филтри во Владата. Министерот Таравари рече дека доколку Владата не го одобри при филтрирањето и доколку граѓаните се против ваков договор, тој нема да го потпише и ќе ја поништи постапката.

„На денешната прес-конференција на СДСМ беа изнесени целосно невистинити информации поврзани со мене како министер за надворешни работи и надворешна трговија, како и со институцијата со која раководам“, вели потпретседателот на ВМРО-ДПМНЕ, Тимчо Муцунски.

„Станува збор за лажни тврдења, кои не соодветствуваат со фактичката состојба. Проектот за кровната конструкција е тековно одржување на објектот на Министерството, со единствена цел превенција од натамошни оштетувања и поплавување – проблем што настана како резултат на несоодветното одржување на зградата во изминатите години, кога институцијата беше под раководство на ДУИ и СДСМ. Постапката за јавна набавка е спроведена целосно законски, транспарентно и во согласност со сите важечки правни процедури.

Дополнително, манипулативен и тенденциозен обид за политичка дискредитација претставува моето лично поврзување со одлуките на други правни субјекти, вклучително и органи на локалната самоуправа, што е неоснована и злонамерна конструкција.

Во таа насока, ја повикувам Богданка Кузеска и СДСМ во рок од 24 часа јавно да се извинат за ширењето лажни информации и грубо манипулирање со јавноста. Доколку тоа не се случи, ќе бидам принуден да преземам соодветни правни чекори, вклучително и граѓанска постапка за навреда, клевета и нарушување на угледот.

Како министер, останувам цврсто посветен на принципите на транспарентност, отчетност и законитост. Работењето на институциите мора да биде засновано на факти и докази, а граѓаните имаат право на вистински и проверени информации“, стои во фејсбук објавата на потпретседателот на ВМРО-ДПМНЕ, Тимчо Муцунски.

На денешната собраниска седница по повод 8 Март, пратеничката од Левица, Јована Мојсоска, во своето обраќање потсети дека 300 жени го вградиле својот живот во темелите на социјалистичка Македонија:

„Мене ми е драго што ја имам честа да се обратам на ден кој ја симболизира борбата на жената-работничка за политичка и економска рамноправост, ден кој извира од идеалите на истакнатите социјалистки Клара Цеткин и Роза Луксембург.

Кога говориме за жени-борци кои предничеле во борбата за право на глас на жената ние не можеме а да не спомнеме, дека овие жени се бореле и против суровите услови на нивното време. Нивната макотрпна борба за право на глас на жените била надополнета со силен отпор против неправедниот капиталистички систем кој брутално ги експлоатирал – сите овие жени се бореле за свет во кој сите народи ќе бидат рамноправни, за свет во кој рајот на богатите нема да биде граден од пеколот на сиромашните” – потенцираше Мојсоска.

„И тука не заостанувала ниту македонската жена. За време на антифашистичката борба, дури 300 жени го вградиле својот живот во темелите на новата социјалистичка Македонија. И ние не можеме да негираме, денес во време на брутален ревизионизам на историјата, дека македонската жена своето право на глас го стекнале на 11 август 1945 година, со Резолуцијата на АВНОЈ, како дел од социјалистичкото минато од кое некој сега се обидува да бега. Ние не можеме да бегаме од историскиот факт дека над 5.000 жени Македонки храбро, рамо до рамо со мажите-борци, учествувале во антифашистичка борба и ја издвојувале својата слобода носејќи ја петокрака која беше тргната токму од државниот грб. Ние не можее да бегаме од фактот дека македонките-жени својата полноправна политичка и социјална рамноправност ја стекнале во тогашното напредно социјалистичко уредување, дури и пред други европски земји” – потсети таа.

„Низ нашата колективна меморија живее споменот на младите девојки, кои до последен здив се бореле за слободата во која верувале. Ние не можеме и не смееме да го заборавиме херојството на Вера Јоциќ, која загинала на само 21 година во борба со бугарскиот окупатор, ние не смееме да го заборавиме херојството на младата Ибе Паликуќа, која загинала на само 17 години во борба со балистите. Ние не смееме да ги заборавиме зборовите на првата жена стрелана од политички причини во Грција, нашата Мирка Гинова, која гордо ќе каже: Се борев и умирам за поарен живот на другите, а не за мојот” – кажа пратеничката од Левица.

„И мојата порака на овој ден до сите жени е: На македонските жени никој не им даде рамноправност – туку тие, со масовно учество во народноослободителната борба и со оружје во рака – се изборија за својата слобода. Иако патот е долг и тежок, како што говореше Роза Луксембург, нам ништо не ни недостасува – само време”- заклучи Мојсоска.