Сè уште немаме договорено коалиција со поголемите партии за гласовите за претстојниот втор круг на гласање за претседател на државата, изјави претседателот на Движењето ЗНАМ – За наша Македонија, Максим Димитриевски повикувајќи на масовна излезност на изборите на 8 мај.
Тој го повтори ставот од предизборниот период, дека за гласовите добиени на негово име нема морално, ниту етичко право да бара да се гласа за некој од кандидатите.
„Во овој момент нема договорено ниту една коалиција. Како ќе одлучи партиското раководство на партијата, така и ќе постапиме“, рече Димитриевски.
Димитриевски, барајќи ја поддршката за листата на пратеници во Изборната единица 5 на ЗНАМ предводена од Весна Бендевска, најави продолжување на патот во евроинтегративниот процес, изнаоѓање на соодветни решенија со редефинирање на преговарачката рамка, надминување на проблемите со соседна Бугарија и целосна интеграција на Македонија во ЕУ, но притоа заштита на националните македонски интереси, сопствен идентитет, јазик, самобитност, континуитет.