Комисијата за осигурување од автомобилска одговорност на денешната седница го разгледа доставениот извештај од Националното биро за осигурување поврзано со зголемените цени по основ на премија за вршење на дејноста на осигурување.

На состанокот Комисијата му укажа на Националното биро за осигурување и на регулаторот Агенцијата за супервизија на осигурувањето во текот на денешниот ден да им предложи на друштвата за осигурување до крајот на денешниот ден да ги стават во мирување одлуките за зголемување на трошоците и да ги вратат на ниво од пред 25 април 2024 година и да ја известат Комисијата во текот на денешниот ден. Ваквото укажување е со цел обезбедување транспарентност и предвидливост на процесите, имајќи предвид дека компаниите ниту поединечно, ниту преку Националното биро за осигурување го немаат известено регулаторот, односно Агенцијата за супервизија на осигурувањето ниту Комисијата дека планираат да ги зголемат трошоците по основ на премијата за вршење на дејноста на осигурување, и на тој начин не е обезбеден инклузивен пристап и кооперативност со сите засегнатите страни при донесување на одлуките.

Комисијата за осигурување од автомобилска одговорност на денешната седница побара од регулаторот, односно Агенцијата за супервизија на осигурувањето, да изготви анализа за оправданоста и исправноста на донесените одлуки од страна на друштвата за осигурување, во насока на заштита на крајните корисници, а со цел обезбедување сеопфатна информација за донесување објективна и транспарентна одлука. Во правец на ова е укажувањето кон регулаторот за ставање во мирување на одлуката за зголемување на цената на трошоците од страна на друштвата за осигурување. Истовремено, побара од друштвата за осигурување преку Националното биро да дадат свој придонес во изготвување на анализата и предлог-заклучоци за промена на Тарифата на премии за осигурување на сопствениците на моторни возила од одговорност за штети предизвикани на трети лица.

На состанокот, Комисијата одлучи во најскоро време по доставување на анализата од регулаторот, односно Агенцијата за супервизија на осигурувањето, да свика седница и да ја разгледа доставената Информација и да донесе соодветни заклучоци.

Не може да правиш разлика со гласови од Роми, Турци и Бошњаци, а после да се повикуваш на албанска опција, рече денес претседателот на Демократско движење и носител на листа во првата изборна единица на коалицијата ВЛЕН, Изет Меџити. Тој смета дека пречка на Демократската партија за интеграција (ДУИ) да стане албанскиот партнер во идната влада е и тоа што тие во 2016 година го прекршија договорот победник да коалицира со победник.

„Во 2008 година имаше мајски договор со кој беше предвидено победникот кај Албанците и победникот кај Македонците да коалицираат и да направат влада. Но токму ДУИ во 2016 година тоа го прекрши бидејќи ВМРО доби 51 пратеник, СДС 49. ДУИ одлучи да го прекрши договорот, од оваа призма јас мислам дека добро направи тогаш што го прекрши договорот бидејќи имаше стратешки интереси и тоа беше потребно за државата, но кога ќе ги прекршиш договорите, немаш право истото да го бараш од другите, тоа е првиот факт. Вториот факт кој што не оди во прилог на нив е дека на овие избори заради ВЛЕН, заради тоа што има силна опозиција, Ахмети спасот го бараше кај Ромите, Турците, Бошњаците.. Тоа е легитимно што направи коалиција со нив, но веќе не може да се повикува дека тој е албанска опција. Така е бидејќи разликата во гласови ја направи со помош на малите заедници. Не може разлика да правиш со нив и после да се повикуваш на албанска опција. Тие веќе не се чиста албанска опција. Чиста албанска опција е само ВЛЕН“, рече Меџити.

Со коалицирањето со партии на други помали заедници, Меџити смета дека ДУИ одбрале да бидат опозиција оти не би можеле да влезат во новата влада како коалиција.
„Сите знаеме дека ВМРО треба да ја води новата влада. Тие во коалицијата имаа турска партија, бошњачка партија, ромска партија, дури имаат и по две – три така да немаат потреба од други партии од помалите заедници оти нема да има логика, сите од помалите заедници треба да бидат дел од владата, нема да остане никој во опозиција. Ништо не оди во прилог на ДУИ. Ние сме единствена албанска опција и убедени сме дека на осми мај, на парламентарните избори ние ќе бидеме легитимни претставници на Албанците како победници со најголем број гласови од Албанците, со најмногу пратеници Албанци во Собранието, ќе имаме бадентерово мнозинство, односно ги имаме сите фактори кои одат во прилог на една вистинска промена на оваа Влада во Република Македонија“, рече Меџити.
Не сакаше да даде конкретен одговор на новинарско прашање кога би се отворил Уставот за во него да се внесат Бугарите. Место одговор тој кажа дека сега се фокусирани на 8 мај, а за се понатака ќе седнат на маса и ќе се договараат.

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 0,57% во однос на одлуката од 22.4.2024 година.

Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 1,68%, кај дизелот намалувањето е за 2,026%, кај екстра лесното масло намалувањето е за 1,78% и кај мазутот зголемување е за 0,059%.

Курсот на денарот во однос на доларот во изминатиот период по кој беа формирани цените со претходната пресметка е понизок за 0,166%

Малопродажните цени на бензинот ЕУРОСУПЕР БС-98, на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се намалуваат за 0,50 ден/лит.

Малопродажната цена на бензинот ЕУРОСУПЕР БС-95 не се менува.

Малопродажната цена на Мазутот М-1 НС се зголемува за 2,107 ден/кг и сега ќе изнесува 46,661 ден/кг.

„Напоменуваме дека ова се максималните цени на нафтените деривати од 00:01 часот на 30.4.2024 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.