Гласачките места беа отворени во 7 часот, а право на глас имаа 1 814 317 лица запишани во Избирачкиот список
Граѓаните на Македонија до 19 часот можеа да гласаат на седмите претседателски избори во земјава. По затворањето на избирачките места, ќе можат да гласаат само лицата што во тој момент се затекнале во објектот каде што се гласа.
Гласачките места беа отворени во 7 часот, а право на глас имаа 1 814 317 лица запишани во избирачки список. Тие на 3 480 избирачки места можеа да се изјаснат за еден од седумтемина кандидати – Стево Пендаровски, Гордана Силјановска-Давкова, Стевчо Јакимовски, Бујар Османи, Билјана Ванковска, Арбен Таравари и Максим Димитревски.
Излезеноста до 17 часот од обработените податоци што стигнале до Државната изборна комисија е 42,38%. Според бројот на гласачи, тоа е нешто над 747 илјади од обработени 97%, односно од 3 376 избирачки места, покажуваат податоците на ДИК.
Според првичните оценки на ДИК, МВР и набљудувачите, изборниот ден помина мирно и без проблеми.
ДИК првичните резултати од гласањето добиени по електронски пат ги објавува сукцесивно, а резултатите од записниците од ОИК во рок од 12 часа по завршувањето на изборите.
Конечните резултати од изборите ДИК ги објавува во рок од 24 часа од денот на нивната конечност.
За претседател ќе биде избран кандидатот што освоил мнозинство гласови од вкупниот број евидентирани избирачи, односно 907.159 гласови.
Ако никој не го добие потребното мнозинство, ќе се организира втор круг во кој одат двајцата кандидати кои добиле најмногу гласови. Вториот круг од претседателските избори се одржува во рок од 14 дена од завршувањето на првиот круг, во случајов на 8 мај, заедно со парламентарните избори.
За шеф на државата ќе биде избран кандидатот кој добил мнозинство од гласовите, доколку на гласачките места излегле повеќе од 40 отсто од запишаните избирачи, односно 725.727 гласачи, што е предвидено во Изборниот законик, а за него гласале 362.864 избирачи.
Доколку и во вториот круг ниту еден од двајцата кандидати не добил потребен број гласови, се повторува целата изборна постапка.
Денешните претседателските избори ги следеа вкупно 1601 набљудувач, од кои 915 домашни и 544 меѓународни набљудувачи, како и 58 странски новинари.