Под слоганот „Нема откажување од иднината„ карванот на СДСМ и коалицијата ја почна кампањата за парламентарните избори. Пред носителите на изборните листи, министрите и членството, се обрати претседателот на партијата и носител во првата изборна единица, кој вети порешителна и поефикасна борба против криминалот и корупцијата.
Главниот фокус на оваа коалиција останува членството во ЕУ. Најави дека, раководни места во министерствата и институциите ќе има само за оние кои навистина го заслужуваат тоа со својата професионалност.
Ковачевски се осврна на сработеното во изминатиот мандат на Владата предводена од СДСМ, но и ги потенцираше мерките предвидени во програмата, опишувајќи ја како реална и остварлива.
Најави целосна реформа на судскиот совет и на советот на јавни обвинители,како и драстично зголемување на платите на медицинскиот персонал.
Упати критики до опозициската ВМРО-ДПМНЕ кои ги обвини за лицемерие.
На настанот, видео обраќање имаше и членот на нивната сестринска партија, германскиот социјалдемократ,Олаф Шолц, со порака дека, процесот на проширување со Македонија и државите од Западен Балкан е потребен за силна Европска Унија.
На крај, сите носители на кандидатските листи се потпишаа на муралот изработен од младиот уметник Давид, кој ја симболизира пораката дека нема да се откажат од европската иднина.
Далиборка Демјанска Цветановска