На платото пред Офицерски дом во Битола битолчани во голем број, покрај на платото, околу Офицерски и на Широк Сокак, точно на полноќ кога се преклопија сказалките на “саатот“ во Битола, со огномет влегоа во Новата 2025 година, со дочек кој го организираше Општина Битола, насловен “Ноќ на нови почетоци“, во рамките на “Зимска приказна“.
“Влегувањето“ во Новата година помина во знак на песните за Битола, на Димитар Андоновски и кларинетот на Благојче Талевски, придружувани од групата “Фонтана“ од Битола. 
Откако Дедо Мраз одброи за почеток на Новата 2025 година се обрати градоначалникот на Битола, Тони Коњановски и рече:
-Ви благодарам за поддршката која ни ја давате, а се надевам дека и ние ви возвраќаме на вистински начин. Ви благодарам на посетеноста вечерва, кога ве има во огромен број, од Битола и од други градови, со кои се сретнав вечерва, а и за досега откако сме заедно во “Зимската приказна“. Вечерва започна искачувањето на планинарите на Пелистер, кои утре, во првите мугри ќе го имаат најубавото изгрејсонце од врвот Пелистер, на 2601 метар надморка висина. Ви посакувам во новата 2025 година да бидеме сите живи, здрави, да не прати среќа и годината која е пред нас да биде бериќетна.
Додека Димитар, Андријана, Борче, Сузана, Зиуца запеаја заедно, се “испука“ големиот огномет. 
На стартот на Новата 2025 година битолчани и нивните гости уживаа во музиката на дувачки оркестар, “Блезери“.
Во пладневната програма се одржа детска театарска претстава “Исчезнатиот Дедо Мраз“, изведба на песни од детскиот музички фестивал “ТРА ЛА ЛА“, театарска претстава „Новогодишна неизвесност“ на “Солза и смеа“.
Вечерната програма започна со вастап на Борче Наумовски – Министерот и настап на рок бенд “Б – 52“.
Од инфо-центартот на НП “Пелистер“ заминаа и планинарите на вечерното искачување кон врвот Пелистер, насловено како “Први на први“. 
На 1 јануари програмата на “Зимската приказна“ започнува до 19 часот со Dj Kekel, а потоа и на “Dj B – Boy“. Следува настапот на музичката група КОД 369 (Памперс) и на “Eruption Band“.
Текст и фотографии: Сашо Ристевски
