Ракометарите на Еурофарм Пелистер денес во Битола го играат последниот натпревар во Лигата на шампионите оваа сезона. Битолчани во ЛШ освоија осум бода но за жал, не беа доволни за поминување на групната фаза. Во последното коло од групната фаза „зелено-белите“ пред својата публика ќе пречекаат тимот на ПСЖ од Франција,
Српскиот бек на “пелистерци“ Урош Борзаш, истакна дека дуелот со парижани ќе биде празник за битолчани и најави голема борба и изненадување
-Оставаме зад нас тежок период. Мислам дека бевме добри, ги победивме важните натпревари против Алкалоид, Охрид и Динамо Букурешт. За жал се испостави дека нема да ја поминеме групата во Лигата на шампионите. Дуелот против ПСЖ в четврток е празник за луѓето во Битола, бидејќи ни доаѓа една од најдобрите светски екипи. Треба да се покажеме во вистинско светло, да дадеме максимум како и на сите натпревари досега и да се обидеме да победиме. Знаеме дека ПСЖ ќе дојде мотивиран во Битола, бидејќи важно им е да завршат второпласирани во групата и директно да се пласираат во четвртфинале. Ќе дојдат во најсилен состав и со мотив да победат.
Последните натпревари против ПСЖ покажаа дека добро играме против овој тим. Одигравме храбро и не го респектиравме ривалот на првиот дуел сезонава. Така треба да бидеме и в четврток и да ги искористиме нашите шанси и нивните слаби страни.
Сакам да се заблагодарам на атмосферата во Лигата на шампионите оваа сезона. Навистина ги имаме најдобрите навивачи во Европа, салата е веќе распродадена в четврток и верувам дека фановите пак ќе бидат со нас“, рече Борзаш.
Средбата меѓу македонскиот и францускиот шампион е вечер со почеток од 20:45 часот.
