Од денеска поскапа струја во просек од 7,4 проценти. Почнува примената и на новиот тарифник со кој на граѓаните ќе им се мери потрошувачката. Поскапи киловати ќе добијат сите домаќинства.
Најмалку од 5,5 отсто зголемување на цената ќе добијат оние од првиот блок, кои трошат до 210 киловат часови, најголем скок на цената пак за дури 140 проценти ќе имаат оние од послендиот блок, чија потрошувачка надминува 1.050 киловати.
ПРВ БЛОК 0 – 210 5,5 %
ВТОР БЛОК 210 – 630 10.3 %
ТРЕТ БЛОК 630 – 1050 18,3 %
ЧЕТВРТ БЛОК НАД 1050 138,7 %
Според новиот ценовник киловат час во првиот блок ќе чини:
ПРВ БЛОК 7,7 денари за kwh
ВТОР БЛОЈ 8,05 денари за kwh
ТРЕТ БЛОК 8,63 денари за kwh
ЧЕТВРТ БЛОК 17,42 денари за kwh
На сајтот на регулаторната комисија за енергетика поставен е и калкулатор со кој граѓаните според потрошените киловати можат да пресметаат колку треба да платат.
Само за пример, ако едно домаќинство за потрошени 400 киловати во евтина и 350 киловати во скапа тарифа до вчера плаќало по 4.400 денари, од денеска за истата потрошувачка ќе треба да платат 350 денари повисока сметка, односно 4.750 денари.
За дел од експертите тарифникот ќе предизвика многу нејаснотии, од РКЕ пак очекуваат со него домаќинствата да почнат рационално да ја користат струјата.
За најголем дел од индустријата пак односно за малите бизниси, електричната енергија поскапува за нешто над 40 отсто. Ако досега за киловат час тие плаќале 13,46 денари, сега ќе ги чини 19,04 денари или 41,3 проценти повеќе. За индустријата првпат се воведува и евтина струја – од 22 до 6 часот. Во овој период за ефтина струја, за киловат тие ќе плаќаат 15,5 денари или за 15,1% поскапо од досегашната единствена тарифа за малите индустриски потрошувачи..
Вчера од енергетскиот форум, од Владата предупредија дека не чека тешка зима, но уверуваат и дека нема да има рестрикции. ЕСМ пак прави напор да обезбеди 100 проценти од потребите на електрична енергија на домашниот пазар, за да нема потреба од увоз.
Ирена Чачкова