Во Изборната единица 5 коалицијата „Европски фронт“ освоила 27 013 гласа, што ѝ обезбедуваат четири пратенички мандати, наспроти еден мандат, колку што би имала „Вреди“, со добиени 11 067 гласа
Разликата во гласови во корист на „Европскиот фронт“ во однос на „Вреди“ во „шестката“ е најголема во Кичево и изнесува 5 спрема 1. Во оваа општина коалицијата на ДУИ има освоено 5 362 гласа, за разлика од 1 384 колку што има „Вреди“
И „Европскиот фронт“ предводен од ДУИ и коалицијата на опозициските партии на Албанците „Вреди“ синоќа, секоја во своите редови, ги одбележаа резултатите што ги постигнаа на вчерашните парламентарни избори.
Симпатизерите на „Вреди“ со факели славеа пред штабот на коалицијата во Тетово, а со огномет, зурли и тапани нивните истомисленици го прославуваа исходот пред седиштето на плоштадот „Скендербег“ во Скопје.
Коалицијата се прогласи за победник на изборите кај Албанците и, како што изјави синоќа лидерот на Движењето Беса, Билал Касами, кое е дел од „Вреди“, уште следниот ден, односно денеска ќе ги почнат преговорите со победникот во македонскиот блок ВМРО-ДПМНЕ за формирање влада. Тој кажа и дека нивните анализи покажуваат дека најверојатно ќе имаат еднаков број пратеници со нивните политички ривали – „Европскиот фронт“ предводен од ДУИ.
Поскромни во реакцијата на исходот од парламентарните избори беа во ДУИ. Потпретседателот и портпарол на ДУИ, Арбер Адеми на синоќешната прес-конференција рече дека „Европскиот фронт“ ќе биде сведок на историска победа на овој, како што кажа, сенароден рефендум, кој ќе ја запечати европската иднина на земјата. На 50 отсто од пребројаните гласови, тој рече дека разликата меѓу нивната и коалицијата „Вреди“ е 30 илјади гласа и дека со овие резултати проценките се дека „Европскиот фронт“ ќе има над 20 пратеници во Собранието.
Сепак, според последните податоци на Државната изборна комисија (ДИК), објавени денеска на нивната веб-страница, а кои секцесивно се ажурираат, бројот на мандати во Собранието што би ги имал „Европскиот фронт“ е 19, додека коалицијата на опозициските партии на Албанците „Вреди“ е со освоени 13 мандати.
Овој распоред на мандатите е врз основа на обработени 99,60 отсто или 3 463 од вкупно 3 477 избирачки места. Што се однесува до бројката и процентот на обработени избирачи, тие од утрово на веб-страницата на ДИК изнесуваат 1 802 165, од вкупно 1 815 350 лица запишани во единствениот избирачки список, или во проценти – 99,27 отсто.
Што се однесува до распоред на гласовите меѓу „Европскиот фронт“ и „Вреди“ по изборни единици, најголема разлика или предност во корист на коалицијата предводена од ДУИ е забележлива во петтата изборна единица, каде што таа, според досега обработените податоци на ДИК, има освоено три пратенички мандати повеќе од „Вреди“.
Изедначени во ИЕ 1
Во Изборната единица 1 и „Европскиот фронт“ и „Вреди“ се безмалку изедначени во освоените гласови во апсолутни бројки, со блага предност на „Вреди“, а буквално изедначени според бројот на пратеници што би ги имале во Собранието. Коалицијата предводена од ДУИ во „единицата“ добила 20 560 гласа, додека коалицијата на опозициските партии на Албанците 21 604 или 1 044 гласови повеќе. И двете партии, според резултатите и симулацијата на ДИК, би имале по двајца пратеници во Собранието од оваа изборна единица.
Со освоени 9 354 гласови наспроти 7 462, „Европскиот фронт“ е, условно кажано, победник во Сарај, додека „Вреди“ со 8 563 освоени гласа во Чаир е пред коалицијата предводена од ДУИ, која во оваа скопска општина има освоено 6 160 гласа.
Во втората изборна единица „Европскиот фронт“ со 30 626 гласа би имал четири мандати, еден повеќе од коалицијата на опозициските партии на Албанците, која има 25 820 гласа. Овде коалицијата на ДУИ има освоено повеќе гласови во Липково, Арачиново, Чучер-Сандево и во Шуто Оризари, додека „Вреди“ ја има предноста во делот од општина Чаир, кој припаѓа во втората изборна единица.
Во третата и во четвртата изборна единица, и двете коалиции немаат освоени пратенички мандати. Сепак, воочливо е дека од оние што гласале за овие две политички опции, гласовите завршиле кај „Европскиот фронт“. Така, на пример, во „тројката“ оваа коалиција има освоено 3 819 гласа, наспроти 716 колку што има „Вреди“.
Во „петката“ ДУИ победува во Струга и во Дебар
Во Изборната единица 5 коалицијата „Европски фронт“ освоила 27 013 гласа, што ѝ обезбедуваат четири пратенички мандати, наспроти еден мандат колку што би имала „Вреди“, со добиени 11 067 гласа.
Во оваа изборна единица коалицијата на ДУИ има подобар резултат и ја носи победата во Струга, Центар Жупа, Дебар, Долнени и Пласница.
„Европскиот фронт“, условно кажано е победник и во Изборната единица 6, која е со доминантно албанско население, иако разликата во освоени пратенички мандати не е толку голема. Коалицијата предводена од ДУИ со освоени 53 817 гласа би имала девет мандати, додека „Вреди“ има освоено 47 687 гласа, што од нивната листа ќе повлече седум идни пратеници во законодавниот дом.
Разликата во гласови во Кичево 5 спрема 1 во корист на „Европскиот фронт“
Според општини, „Европскиот фронт“ со 11 080 гласа е со минимална предност пред „Вреди“ во Гостивар, каде што коалицијата на опозициските партии на Албанците, чиј градоначалник Арбен Таравари е дел од неа, има освоено 10 719 гласа. Од друга страна, „Вреди“ во Тетово, општината со која раководи уште еден од лидерите на оваа коалиција, Билал Касами, има 17 160 гласа, наспроти 16 219 колку што освоил „Европскиот фронт“. Коалицијата предводена од ДУИ има освоено двојно повеќе гласови во Врапчиште, нешто помалку од илјада гласови повеќе во Боговиње. „Вреди“, пак, со неколку стотина гласови е во предност во Теарце и со нешто повеќе од 100 во Желино.
Разликата во гласови во корист на „Европскиот фронт“ во однос на „Вреди“ во „шестката“ е најголема во Кичево и изнесува 5 спрема 1. Во оваа општина коалицијата на ДУИ има освоено 5,362 гласа, за разлика од 1 384, колку што има „Вреди“.
Право на глас на парламентарните избори имаа 1 815 350 граѓани запишани во избирачкиот список.
Се гласаше согласно пропорционалниот модел во шест изборни единици. Гласање за парламентарните избори во дијаспората не се спроведе бидејќи немаше доволен број пријавени наши државјани.
Во првата изборна единица има 313 183 гласачи, во втората 321 087, во третата 275 034, во четвртата 278 721, во петтата 310 216 и во шестата изборна единица 317 109 гласачи.