Во Гостивар попладнево настан во чест на Денот на македонскиот јазик

Во пресрет на Денот на македонскиот јазик, кој се одбележува на 5-ти мај, попладнево во Гостивар ќе се одржи манифестација под мотото „Јазикот е нашата татковина“. Настанот го организира Центарот за култура „АСНОМ“, а ќе учествуваат ученици од основните училишта.

Програмата ќе биде исполнета со литературно читање на лични творби, стихови од антологиски макеоднски автори како Кочо Рацин, Константин Миладинов, Блаже Конески и други, исто така драматизации, ритмички изведби и фолклорни игри. Како почесни гости се најавени проф. д-р Кристина Николоска, директор на Меѓународниот семинар за македонски јазик, литература и култура при УКИМ во Скопје и Горјан Петревски, писател  за деца и млади.

Одбележувањето се организира порано од конкретниот датум, имајќи ги предвид пролетниот распуст и велигденските празници кои следуваат.

Настанот ќе се одржи во големата сала на Центарот за култура, со почеток во 17 часот.