Во продолжението од судењето на седумтемина лекари, специјалисти и медицински работници кои се обвинети за невнимание кое довело до смрт на фудбалската легенда Диего Марадона, и патолозите го дадоа своето вештачење.
Според двајца патолози кои извршиле обдукција на телото на покојниот Марадона, не биле пронајдени траги од наркотични дроги или алкохол, што дефинитивно ја исклучува теоријата дека славниот ас починал од предозирање.
„Ниту еден од четирите примероци не покажа траги од алкохол, кокаин, марихуана, екстази или амфетамин“, изјави биохемичарот Езекиел Вентоси.
Друг експерт, Алехандро Езекиел Вега, изјави дека срцето на Марадона било зголемено и дека во моментот на неговата смрт тежело 503 грама, што е речиси двојно повеќе од тежината на срцето на просечен човек (250 до 300 грама).
Вега објасни дека прегледот на срцевиот мускул на починатиот покажал дека Марадона страдал од тешка форма на исхемија (намален проток на кислород и крв низ артериите). Исто така, утврдено е дека во крвта на Марадона има траги од пет супстанци кои одговараат на антидепресиви, антиепилептици, антипсихотици и лекови против гадење.
Патологот Силвана де Пјеро извести дека црниот дроб на поранешниот фудбалер покажал знаци компатибилни со цироза, а биле пронајдени и знаци на откажување на бубрезите, срцето и белите дробови.
Аутопсијата заклучи дека Марадона починал од акутен пулмонален едем како резултат на срцева слабост.
Марадона, да потсетиме, почина во куќа на периферијата на Буенос Аирес, неколку дена откако беше опериран поради хематом што му се создаде меѓу черепот и мозокот.
Според обвинителството, седумтемина професионалци обвинети во овој случај – неврохирурзи, психијатри, психолози, лекари и медицински сестри, кои се грижеле за поранешниот шампион не пружиле соодветна нега, што можеби придонело за неговата смрт.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
