Српскиот претседател Александар Вучиќ по средбата со кинескиот претседател Си Џинпинг изјави дека во Србија му се смееле кога зборувал за летечки такси, но додаде дека Србија разговара со кинеска компанија за летечко такси и дека мисли дека ќе биде воспоставено во 2027 година, кога ЕКСПО се одржува во Белград.
„Мислам дека нема потреба да го споменуваме името на компанијата, но таа е една од најпознатите во светот, па не е тешко да се дознае. Разговаравме и со производителот на електрични автомобили од НР Кина, заинтересирани сме и за нивно доаѓање во нашата земја“, изјави Вучиќ.
Тој потсети и дека Србија купила пет воза од Кина и уште девет за локалните железници, но дека намерата е возовите да се произведуваат во Србија.
„Го прашав претседателот Кси експертите од Народна Република Кина да ја разгледаат оваа можност на најдобар можен начин. Прашав, тоа е само мое барање и не се срамам, и не кријам ништо. Го замолив претседателот Си да погледне, бидејќи имаме голема традиција во градежништвото и во индустријата за возови, а денес кинеските возови се исклучително потребни на европскиот пазар, бидејќи дури и овие најголеми европски компании од Сименс до Штадлер не можат да произведат толку многу возови. … Секој сака возови. Купивме пет брзи возови од Народна Република Кина и уште девет за овие локални линии. И ќе купуваме повеќе, но сакаме да произведуваме овде и тоа може да го купи цела Европа“, додаде Вучиќ.
Тој му се заблагодари на Си и за донацијата од 26 милиони евра како поддршка за натамошниот развој на Србија.
„Гледаме можности за напредок во сите области од општественото живеење. Од култура и спорт до финансии, можеме многу. Се што сонувавме за пругата Белград-Будимпешта ќе завршиме до крајот на годината со помош на кинеска компанија. Унгарците не уверија дека ќе го завршат својот дел до 2026 година“, изјави Вучиќ.
Тој додаде дека со Си разговарал за соработка со други земји, од Унгарија до ОАЕ.
Тој најави и дека наскоро ќе имаме нови авиолинии.
„Ќе летаме директно од Белград до Шангај, Гуангжу и ќе го спасиме летот што го имаме до Пекинг“, додаде тој.
