Главниот преговарач на Косово во дијалогот со Србија, Бесник Бислими ја оцени како неуспешна денешната средба во Брисел, на која двете страни со посредство на Европската унија уште еднаш се обидоа да најдат решение за финансиските дознаки за косовските Срби од Србија, по одлуката на централната канцеларија на Банката на Косово за забрана за користење на српскиот динар во земјата.
Обраќајќи им се на новинарите по средбата со српскиот главен преговарач, директорот на Канцеларијата за Косово во Владата на Србија, Петар Петковиќ и со емисарот на ЕУ за дијалогот, Мирослав Лајчак, Бислими рече дека српската страна на средбата дошла со нови предлози во врска прашањето, а не со одговор за предлозите што Лајчак ги изнесе на претходната средба.
„Нема логика повторно да се среќаваме на оваа тема. Затоа што Србија не е заинтересирана за решение. На извесен начин, ова беше заклучок и на Лајчак, кој рече дека ‘нема да ве повикувам повеќе, но ако сакате да бидете конструктивни, можеме повторно да ја разгледаме можноста за нова средба’“, изјави Бислими.
Тој потсети дека на последната средба е постигнат договор двете страни да ги изнесат своите коментари за предлозите на Лајчак од претходната средба.
– Тие (српската страна) го испратија својот предлог. Во нашите предлози видовме точки каде што можеме да направиме компромиси и да се зближиме, додека во Србија има тенденција да се оддалечи од претходните позиции“, рече косовскиот главен преговарач, оценувајќи дека „тоа докажува дека за Србија прашањето не е нешто итно“.
Тој рече дека, врз основа на предлогот на Србија, може да се заклучи дека „таа држава има две цели“:
„Да се легитимираат незаконските паралелни структури и да се обезбеди нетранспарентност во исплаќањето“, рече Бислими.
Тој рече дека од третата средба (денешната беше петта по ред во врска со прашањето на српскиот динар) нема напредок од страна на српскиот тим. Според Бислими, „тие едноставно се повлекоа“.
Српскиот главен преговарач, Петар Петковиќ, како што јави Радио Слободна Европа, по средбата изјави дека Србија изнела „шест нови конструктивни предлози“, но дека Приштина ги отфрлила сите.
„Не ја затворивме вратата за разговори, затоа што сакаме да најдеме решение“, изјави Петковиќ.
На 1 февруари годинава стапи во сила правилникот на Централната банка на Косово, според кој еврото, согласно косовскиот Устав, станува единствена валута за готовински плаќања во земјата. Оваа одлука предизвика реакции од српската заедница во Косово, но и од офцијален Белград, со оглед дека многу припадници на српското малцинство примаат плати, пензии и други социјални надоместоци од Србија, а тоа досега се вршеше со динари