Од Синдикална организација при Министерството за култура на УПОЗ велат и дека упатуваат јавна благодарност до министерката за култура Бисера Костадиновска-Стојчевска, која не застанала во одбрана на своите вработени и не ги осудила навредите и омаловажувањата упатени кон нив
Синдикална организација при Министерството за култура на УПОЗ бара извинување од претседателката на Синдикатот на културните работници Вера Атанасовска за, како што велат, искажаните навреди, клевети и омаловажувања на собирот што во петокот на 19 април се одржа пред зградата на Министерството за култура.
„Вработените во Министерството за култура најостро реагираат на навредите и омаловажувањата искажани од страна на претседателката на Синдикатот на културните работници на Македонија, Вера Атанасовска. Бараме од претседателката во рок од 48 часа согласно член 12 од Законот за граѓанска одговорност за навреда и клевета, јавно да се извини за искажаните навреди, клевети и омаловажувања, во спротивно ќе треба да се објаснува пред судските инстанци за нарушување на честа и угледот на вработените во Министерството за култура“,
се вели во соопштението од Синдикална организација при Министерството за култура на УПОЗ и нејзиниот претседател Бранко Костовски.
Од Синдикална организација велат дека на протестите на вработените во Министерството за култура минатата година во ниту еден момент не побарале непостапување по потпишаниот Колективен договор за културата, ниту намалување на платите на културните работници туку, напротив, додаваат оттаму, „ја поздравивме нивната одлучност и единство во борбата за подобар статус“.
„Нашите барања беа и се во насока на потпишување и на Колективен договор за вработените во Министерството за култура на ниво на работодавец, со кој ќе се зголемат мизерните примања на вработените во Министерството за култура. Нашата борба е независна од онаа на Синдикатот на културните работници и затоа одбиваме да влегуваме во спиновите на претседателката Вера Атанасовска, која тенденциозно ги упати навредите кон вработените во Министерството“,
се вели во реакцијата.
Согласно сите реакции кои стигнаа до нас вработените во министерството, додаваат оттаму, можеме да заклучиме дека зад она што Вера Атанасовска го упати до вработените во Министерството за култура, не стојат сите членови на Синдикатот на културните работници.
Од Синдикална организација при Министерството за култура на УПОЗ велат и дека упатуваат јавна благодарност до министерката за култура, Бисера Костадиновска-Стојчевска, која не застанала во одбрана на своите вработени и не ги осудила навредите и омаловажувањата упатени кон нив.
„Од министерката Костадиновска-Стојчевска бараме, во иднина, кога ќе зборува за своите заложби и за грижата, како што вели подеднакво за сите, да ја информира јавноста дека ова не важи и за нејзините вработени во Министерството за култура. Платите на вработените во Министерството за култура не се покачени за 52 отсто туку напротив, денес можеме да кажеме дека повеќе од 90 отсто од вработените во Министерството за култура земаат под просечната плата во државата, односно платите се движат од 24 000 до 34 000 денари“,
додаваат во соопштението од Синдикална организација при Министерството за култура на УПОЗ.
Синдикатот на културата (СКРМ) заедно со културните работници од цела Македонија во петокот протестираа пред Министерството за култура, со цел, како што рекоа, да го искажат револтот за неисплаќањето на платите за месец март на над 3 000 вработени, а притоа обвинија дека нема да го добијат и зголемувањето од 12 отсто согласно колективниот договор.
Во обраќањето пред колегите на протестот Вера Атанасовска, претседателка на Синдикатот рече дека Министерството не функционира за тоа што е формирано, а неговото дејствување го доведува до апсурд неговото постоење.
Атанасовска од пред зградата на Министерството им порача на службениците дека патот кон повисоки плати за нив не е преку опструирање на Колективниот договор за култура, туку, како што рече, преку искрена, натпартиска социјална борба за нивните права за која секогаш ќе ја имаат поддршката од СКРМ.
По протестот, на својот фејсбук-профил со коментар се огласи министерката за култура Бисера Костадиновска-Стојчевска која рече дека вработените во културата ја добиле мартовската плата покачена за 12 отсто.