Лидерот на ВМРО-ДПМНЕ во реакцијата вели дека ја разбира нервозата и паниката на Ахмети бидејќи по првпат тој и неговата партија се прочитани и пред пораз
Ахмети на синоќешниот митинг што се одржа во Скопје рече дека едвај чекал да дојде и да каже неколку збора за лидерот Мицкоски, за кого рече дека бил пораснат со гурабии и бисквити и дека уште му излегува млеко од устата
Како што изборната кампања за парламентарните избори, која влегува во својот петти ден, зема замав, а онаа за претседателските избори е во својот финиш, така се заострува и реториката меѓу главните актери во трката за влез во парламентот.
Лидерот на ВМРО-ДПМНЕ, Христијан Мицкоски, денеска преку објава на Фејсбук одговори на пораките кои до него синоќа ги упати претседателот на ДУИ, Али Ахмети.
Ахмети, како последен говорник на централниот митинг на ДУИ и на коалицијата „Европски фронт“ од кампањата на нивниот кандидат за претседател на државата Бујар Османи, обраќајќи се до лидерот на ВМРО-ДПМНЕ, вчера вечер му порача да не започнува беља и да го избира секој збор.
Мицкоски во одговорот вели дека нервозната реакција на Ахмети уследила откако вчера тој од митинзите на ВМРО-ДПМНЕ и коалицијата во Аеродром и Гази Баба ги повика опозициските партии на Албанците на обединување и најави дека има намера уште првиот ден по изборите да контактира со нив за заедничка соработка која ќе ќе се темели на принципи околу кои ќе се обединат.
Заканите, вели Мицкоски, не го заплашуваат и доаѓаат од човек пред политичка пензија, „малку и заборавен, но со добро грло кое го вежба пеејќи по државни институции и партиски прослави“.
„Вчера во Аеродром и Гази Баба ја повикав албанската опозиција на обединување против оваа власт и изразив јавна намера дека веднаш по изборите, уште првиот ден ќе остварам контакт со нив за заедничка соработка која ќе се темели на принципи околу кои ќе се обединиме. Уште истиот ден се јави Али Ахмети, нервозно одговарајќи, прозивајќи ме со навреди и доза на закани, но треба да знае дека неговите закани не само што не ме заплашуваат, туку и добро ме засмејуваат“,
напиша Мицкоски на својот фејсбук-профил.
Ахмети на митингот што се одржа во Скопје рече дека едвај чекал да дојде и да каже неколку збора за Мицкоски, за кого рече дека бил пораснат со гурабии и бисквити и дека уште му излегува млеко од устата.
„Јас патував малку подолго и едвај чекав да дојдам тука кај вас за да му кажам неколку збора на Христијан Мицкоски. Христијан Мицкоски е пораснат со гурабии, Христијан Мицкоски е пораснат со бисквити. Јас сум пораснат во кула од камен што трипати е изгорена од освојувачите. Христијан, народот мој вели дека камен по камен се гради тврдината, збор по збор започнува бељата, не започнувај беља. Не започнувај беља и избирај ги зборовите, уште си млад и од устата млеко ти излегува“,
рече Ахмети.
Во врска со ваквите наводи, Мицкоски во одговорот вели дека храната од детството ја печалеле неговите родители, а она што е важно и што треба да го одговори Ахемти е со што тој ги хранел неговите голобради момчиња за денеска да печалат милиони.
„Важен му бил на Али мојот оброк од детството, хммм… чудно, па се обидува заканите преку вицови да ги испрати. Ќе му одговорам! Мојот оброк Али во детството го печалеа моите родители со многу љубов и жртва да ме израснат и воспитаат во личност која ќе почитува и ќе се бори за својата Македонија. Но што е важно? Важно е Али да дадеш одговор со што ги хранеше твоите, па денес голобради момчиња печалат милиони, ја купуваат ‘Соравија’ или, пак, како го спечали тој дворец во Зајас кој е како на некој блискоисточен шеик, а не политичар од сиромашната Македонија“,
пишува Мицкоски во објавата.
Лидерот на ВМРО-ДПМНЕ во реакцијата вели дека ја разбира нервозата и паниката на Ахмети бидејќи по првпат тој и неговата партија се прочитани и пред пораз.
„Доаѓа времето за одговори на многу прашања. Ова не е 2001, туку 2024 година, 23 години потоа, а ДУИ ја претвори во криминална организација од која страдаат и Албанците и Македонците. Многу брзо од денес и кексите и млекото ќе ти преседнат…“,
го завршува својот одговор Мицкоски.
Лидерот на ВМРО-ДПМНЕ на речиси сите досегашни митинзи во рамките на кампањата на кандидатката за претседател на државата поддржана од нив и коалицијата, Гордана Силјановска-Давкова, како и на промотивните митинзи за парламентарните избори ја критикува Демократската унија за интеграција обвинувајќи ги нејзините највисоки партиски и државни функционери за криминал и корупција. Мицкоски во пораките од митинзите често наведува и дека изминативе години стотина луѓе од ДУИ и неколкумина од СДСМ станале граѓани од прв, додека сите други се граѓани од втор ред во државата.