Свет
Јорданскиот министер: Нетанјаху се обидува да го префрли фокусот од Газа на конфликтот со Иран
Јорданскиот министер за надворешни работи Ајман Сафади денеска изјави дека меѓународната заедница треба да го спречи израелскиот премиер Бенјамин Нетанјаху да го сврти вниманието на светската јавност од Појасот Газа кон конфликтот меѓу Израел и Иран.
Во изјава за медиумите за време на заедничката конференција со неговата германска колешка Аналена Бербок, тој рече дека Иран одговорил на нападот врз неговиот конзулат во Дамаск, пишува „Тајмс оф Израел“.
„Ние сме против ескалација. „Нетанјаху сака да го оттргне вниманието од Газа и да го префрли фокусот на Иран“, рече Сафади, пренесува Танјуг.
Воздухопловните сили на Јордан пресретнале десетици ирански беспилотни летала во сопствениот воздушен простор за време на нападот на Иран врз Израел изминатиот викенд, велејќи дека тоа го направиле за да се осигура безбедноста на своите граѓани.
Јордан, исто така, дозволи израелски борбени авиони да влезат во нејзиниот воздушен простор за да ги соборат дојдовните проектили, при што ловците на двете земји беа координирани од американската војска, што е како што се оценува првпат Израел и Јордан да се борат на иста страна, пренесуваат медиумите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
САД: Реториката на Додик е страшна
Соединетите Американски Држави го сметаат лидерот на босанските Срби, Милорад Додик, за закана за стабилноста и се подготвени да реагираат на секоја закана за опстанокот на Босна и Херцеговина како држава, изјави американскиот амбасадор во Сараево, Мајкл Марфи.
Во интервју за телевизијата N1, чии делови беа објавени на веб-страницата во текот на денот, Марфи ја оцени како целосно неприфатлива „страшната реторика“ што Додик ја употребува во своите изјави, особено неговите закани за отцепување на Република Српска од државата Босна и Херцеговина.
Тој потсети на изјавите на Додик, како онаа дека „не сака да го дише истиот воздух како и Бошњаците“ нагласувајќи дека тоа мора да ги загрижи сите, вклучително и меѓународната заедница.
Разузнавачките процени на американската влада, рече Марфи, укажуваат колку Додик претставува закана за Босна и Херцеговина и за нејзината иднина поради што од 2017 година е цел на санкции, кои му забранија да патува во САД и ги замрзна неговите средства.
„Ние ќе продолжиме да го правиме тоа. Користевме санкции за да ги повикаме поединците одговорни за ова однесување и ќе продолжиме да го правиме тоа. Бевме јасни и останува нашата политика дека нема да се воздржуваме кога станува збор за Додик и кој било политичар, кој ја турка земјата кон конфликт, тоа не е во интерес на САД и нема да дозволиме тоа да се случи“, рече американскиот амбасадор.
Тој објасни дека тоа значи оти САД нема мирно да ја набљудуваат можноста за избувнување нов конфликт на почвата на Босна и Херцеговина и затоа силно го поддржуваат продолжувањето на воената мисија на Европската Унија (ЕУФОР), но и решеноста на НАТО да не дозволи секаков безбедносен вакуум во таа земја.
„Нашата политика е цврста и јасна и тоа е случај во последните 30 години. Ние ги поддржуваме територијалниот интегритет, суверенитет и мултиетничкиот карактер на БиХ, тоа е наш интерес и нашата намера е да го браниме“, рече амбасадорот Марфи.
Свет
Кадиров: Насочете ги сите сили и ресурси на државата кон безбедноста на Русија и нејзиното население
Чеченскиот лидер Рамзан Кадиров за време на специјалната операција изјави дека сите сили и ресурси на државата треба да бидат насочени кон безбедноста на Русија и нејзиното население.
„За време на воените операции, мора да се користат сите сили и средства. Сите државни средства мора да бидат насочени кон безбедноста на нашата земја и населението. Поради оваа причина, младите, државните службеници и бизнис-елитата – сите во нашата република се вклучени со цел да се обезбедат момците што се борат на територијата на специјалната воена операција“, рече Кадиров, пренесува „Спутник“.
Кадиров додаде дека чеченскиот министер за млади, Ахмат Кадиров, предал 10 автомобили и 10 квадрокоптери, кои ќе бидат испратени во зоната за специјални операции.
Регион
По атентатот на Фицо, Вучиќ добил порака дека тој ќе биде следен
Српската полиција уапсила едно лице поради, како што се вели, упатување закани кон претседателот Александар Вучиќ.
Според вицепремиерот и министер за внатрешни работи, Ивица Дачиќ, уапсениот е Д. М. од Сомбор и тој е веќе во 48-часовен притвор.
„Поради закана за загрозување на безбедноста на претседателот на државата, сомборецот Д. М. е уапсен и одредена му е мерка притвор во полиција од 48 часа“, се вели во соопштението на српското Министерство за внатрешни работи, кое го пренесува „Танјуг“.
Како што пренесуваат српските медиуми, заканувачките пораки кон Вучиќ биле откако тој на социјалната мрежа „Икс“ објавил дека е шокиран од атентатот на словачкиот премиер Роберт Фицо нарекувајќи го голем пријател на Србија. Во одговорите на неговата објава пишувало дека следната цел ќе биде Вучиќ.