Од СКРМ велат дека вчерашниот допис од Синдикалната организација при Министерството за култура на УПОЗ го доживуваат како бирократско догматски обид за цензура и ограничување на слободата на говор и оти дописот има за цел спречување на СКРМ и во иднина да ја пренесува перцепцијата на вработените во институциите од културата за состојбите и однесувањето на Министерството за култура
Синдикатот на културните работници (СКРМ) ниту претседателката Вера Атанасовска нема да се извинуваат за генералниот став искажан на протестот што во петокот се одржа пред Министерството за култура. Ова е ставот на СКРМ кој денеска го изнесоа преку соопштение откако вчера Синдикалната организација при Министерството за култура на УПОЗ постави рок Атанасовска во рок од 48 часа да се извини или, како што рекоа, ќе треба да се објаснува пред судските инстанци.
Од СКРМ велат дека вчерашниот допис од Синдикалната организација при Министерството за култура на УПОЗ го доживуваат како бирократско-догматски обид за цензура и ограничување на слободата на говор.
„Дописот има за цел спречување на СКРМ и во иднина да ја пренесува перцепцијата на вработените во институциите од културата за состојбите и однесувањето на Министерството за култура“,
се вели во соопштението од СКРМ објавено на нивната фејсбук-страница.
Оттаму велат дека во иднина јавно ќе го признаат придонесот на вработените во Министерството за култура во оној момент кога ова владино тело, согласно препораките на ЕУ, ќе се реформира во вистински јавен сервис, пред сѐ на граѓаните, а потоа на институциите и организациите кои се занимаваат со различните дејности во културата.
Во соопштението, од СКРМ велат дека говорот на претседателката Вера Атанасовска не е нејзин личен став, туку тоа е гласот на вработените во институциите на култура и во него, додаваат оттаму, нема омаловажување, нема невистини, ниту пак клевети, туку, како што велат, има метафори преку кои СКРМ го искажува својот револт кон дејствата на одредени службеници кои по секоја цена еднаш годишно го опструираат Колективниот договор за култура и создаваат антагонизам меѓу Министерството и СКРМ.
„Говорот во суштина е генерален став на членовите на СКРМ, креиран како резултат на серија негативни искуства кои не произлегуваат од соработката или комуникацијата со министрите за култура, туку директно од дејствувањето на поединци вработени во самото Министерство“,
велат од СКРМ.
Од СКРМ велат дека најмало пребарување на интернет-архивите за историјата на нивните реакции ќе покаже дека судирите секогаш настануваат кога треба да се почитуваат правата на вработените во културата согласно Колективниот договор и особено, како што велат, кога треба да се зголеми платата согласно зголемувањето на минималната плата на ниво на држава.
„Како најболно искуство ќе го издвоиме моментот кога Министерството за култура се обиде да ја спречи одложената примена на членот 65 од Колективниот договор, па така нѐ остави без плата и без здравствено осигурување скоро два месеци, во екот на ковид-пандемијата во 2020 година. Министерството буквално се обиде да го саботира договорот и да го одржи хаосот со платите кој со децении беше нормална состојба во културата. Причините на сите ни се јасни и секако не беа во прашање министрите, туку конкретно дејствата на службите на Министерството“,
се вели во соопштението од СКРМ.
Според СКРМ, и сега, традицијата се повтори како резултат на активностите на одредени службеници, кога „ветувањата и изјавите на министерката за култура прозвучеа како првоаприлска шега и беа сосема различни од дејствата на Министерството за култура“.
„Тука мораме да се поклониме и пред лавовската борба на претставниците од Министерството за култура на состанокот во Министерството за финансии, каде што по секоја цена се обидуваа да докажат дека на вработените во институциите од културата не им следуваат бенефициите од Општиот колективен договор за јавен сектор и истите треба да бидат преклопени со Колективниот договор за култура“,
се додава во соопштението од СКРМ.
Нивниот став во однос на платите на вработените во Министерството, како и на вработените во сите другите министерства, велат дека се премногу ниски и дека мора да трпат корекции во нагорна линија.
Поради тоа, додаваат оттаму, ја охрабруваат Синдикалната организација при Министерството за култура на УПОЗ, заедно со другите членки на УПОЗ да се борат за измена на Законот за административни службеници и потпишување на Колективен договор за државни службеници.
Од Синдикална организација при Министерството за култура на УПОЗ, во вчерашното соопштение со кое реагираа на говорот на претседателката на СКРМ, велат дека на протестите на вработените во Министерството за култура минатата година во ниту еден момент не побарале непостапување по потпишаниот Колективен договор за културата, ниту намалување на платите на културните работници туку, напротив, додаваат оттаму, „ја поздравивме нивната одлучност и единство во борбата за подобар статус“.
Согласно сите реакции кои стигнаа до нас вработените во министерството, додаваат оттаму, можеме да заклучиме дека зад она што Вера Атанасовска го упати до вработените во Министерството за култура, не стојат сите членови на Синдикатот на културните работници.
Синдикатот на културата (СКРМ) заедно со културните работници од цела Македонија во петокот протестираа пред Министерството за култура, со цел, како што рекоа, да го искажат револтот за неисплаќањето на платите за месец март на над 3 000 вработени, а притоа обвинија дека нема да го добијат и зголемувањето од 12 отсто согласно колективниот договор.
Во обраќањето пред колегите на протестот Вера Атанасовска, претседателка на Синдикатот рече дека Министерството не функционира за тоа што е формирано, а неговото дејствување го доведува до апсурд неговото постоење.