Кошаркарите на МЗТ Скопје со наведнати глави се вратија од Гостивар. Изгубија синоќа од гостиварци во натпревар од македонската лига. Непријатноста за аеродромци е голема бидејќи ова им е втор пораз од оваа екипа сезонава.
Гостивар потврди дека се мајстори за победи против МЗТ Скопје, ама и „штрковите“ потврдија дека нешто не е во ред со тимот кој инаку многу често губи и во АБА – лигата, а раните ги лечеше во македонската лига. Сега Гостивар им отвори нова рана особено што убедливо го добија и вториот меѓусебен дуел со 88-69.
Останува МЗТ Скопје да се самоанализира и да бара одговори како гостиварци вториот дел од натпреварот го добија со големи 48-29. Оправдувања за ова не треба да се бараат во неколку отсутни играчи. МЗТ мора да се врати на своите добри и препознатливи игри, тоа го очекуваат сите искрени љубители на македонската кошарка.
За потсетување, овој натпреват беше прв од 13-то коло од Првата лига. МЗТ Скопје останува лидер со скор 11-2, а гостиварци се искачија на второто место со учинок 9-4.