На веб сајтот на Бирото за јавни набавки на 14.03. е објавен договор кој општина Кичево го склучила со фирмата АС Сењак за „Изградба, реконструкција и санација на локални патишта, улици, тротоари и други јавни површини во Општината.“
Фирмата АС Сењак е во сопственост на бизнисменот Селаудин Арифи, кој е сват на лидерот на ДУИ, Али Ахмети.
Вкупната вредност на тендерот е 18.000.000 денари (со ДДВ 21.240.000) односно околу 293 илјади евра (со ДДВ, околу 345 илјади евра).
На огласот немало друг пријавен понудувач, а општина Кичево и градоначалникот Фатмир Дехари го потпишале договорот за набавка бидејќи биле во рамките на планираните средства. Станува збор за рамковна спогодба склучена за период за една година.