Туфегџиќ додаде дека осомничениот не може да се даде во бегство затоа што важноста на патната исправа му била истечена и дека тој активно учествува во истрагата
Во Врховниот суд се одржа јавна седница во врска со притворот на таткото на убиената Вања Ѓорчевска, Александар Ѓорчевски, кој е осомничен за вмешаност во грабнувањето на девојчето.
Ова е втора јавна седница пред Врховниот суд по мерката притвор на таткото на Вања, откако во март годинава Врховен ја одби како неоснована жалбата против мерката притвор на Ѓорчевски, по решението на Апелацискиот суд Скопје.
Адвокатот на осомничениот Ѓорчевски, Владимир Туфегџиќ на седницата рече дека од последната одржана јавна седница до денеска, околностите воопшто не се променети.
„Затоа останувам при жалбените наводи дека решението со кое е продолжена мерката притвор е донесено без доволно образложенија во кои не се наведува ниту еден доказ со кој се докажува зошто овој човек би требало да остане во притвор“,
рече тој.
Туфегџиќ додаде дека осомничениот не може да се даде во бегство затоа што важноста на патната исправа му била истечена и дека тој активно учествува во истрагата.
По седницата, Туфегџиќ во изјава за медиумите информира дека бил вештачен мобилниот уред на Ѓорчевски, но дека сѐ уште немаат никакви информации од вештачењето. Тој посочи и дека случајот стигнал и до Центарот за социјални грижи, откако на семејството на таткото на Вања, не им било дозволено да остварат контакт со неговата помала ќерка.
Осомничениот Александар Ѓорчевски се сложи со образложението на својот адвокат и истакна дека е обвинуван, како што рече, за некои работи кои и ден-денеска не ги разбира.
„Бев прикажуван екстремно спротивно од тоа што сум како родител и татко. Сакам и јас да знам што точно се случува затоа што и јас водев истрага, знам парченца од тие делови. Би сакал да го дочекам моментот кога ќе го дознам идентитетот на тие луѓе, сите се подеднакво криви“,
рече тој.
Јавниот обвинител Наум Паноски рече дека Јавното обвинителство останува во целост при изнесените наводи во предлогот.
Јавната седница е одржана на барање на осомничениот Ѓорчевски, а изјавена преку неговиот бранител, адвокатот Владимир Туфегџиќ.
Туфегџиќ во изјава за „360 степени“ рече дека Апелацискиот суд Скопје на 2 април по службена должност го продолжил притворот на Ѓорчевски за нови 30 дена, по што тој го искористил рокот од 48 часа да поднесе жалба на одлуката на Апелација до највисокиот суд во државата, што му го овозможува Законот за кривична постапка.
Во пресрет на јавната седница адвокатот Туфегџиќ вели дека е оптимист и очекува Врховниот суд да донесе одлука со која ќе го укине притворот.
Малолетната Вања Ѓорчевска, која беше пријавена за исчезната на 27 ноември, беше пронајдена мртва во близина на Скопје на 3 декември, кога во близина на Велес беше пронајден мртов и велешанецот Панче, кој, пак, беше пријавен за исчезнат на 24 ноември.
Инаку, за убиството на малата Вања Ѓорчевска и на велешанецот Панче Жежовски се осомничени пет лица меѓу кои и нејзиниот татко, кого истрагата на Основното јавно обвинителство Скопје го товари дека помогнал во грабнувањето на девојчето откривајќи им ја на сторителите рутината на нејзиното движење.
Првоосомничен за убиствата на Вања и на Жежовски е Љупчо Палевски-Палчо кој и понатаму е во Турција, каде што беше уапсен на 5 декември и во моментов се чека негова екстрадиција во земјава.
Покрај Палевски, за случајот осомничени се и Велибор Манев, Влатко Кешишов и Боре Видевски, кои се товарат за по две кривични дела – убиство и грабнување.
Во случајот осомничено е уште едно лице, Стефан Димовски, кој се товари за кривичното дело помагање сторител по извршено кривично дело бидејќи го возел Палевски од Србија, преку Бугарија до Турција. Нему на 12 март му беше укинат притворот бидејќи, како што образложија тогаш од Обвинителството, поради видот на кривичното дело и предвидената казна не постои законска можност тој и понатаму да ја издржува оваа мерка за обезбедување присуство.