-Одговорот на евентуален бојкот на СДСМ и на ДУИ на вториот круг од изборите е мобилизација на граѓаните и масовна излезеност. Доколку обете партии се решат на бојкот, со тоа ќе покажат незрелост, односно дека не се државотворни туку партии кои што водат интерес за малкумината што ги предводат.
Ова денеска го истакна лидерот на ВМРО-ДПМНЕ, Христијан Мицкоски, кој беше во посета на Охрид.
– Треба да сте достоинствени и во поразот. Вчера ВМРО-ДПМНЕ, со резултатите на првиот круг на изборите ја победи целосната владина коалиција убедливо. Тука зборувам на двајцата кандидати на власта – Стево Пендаровски и вториот е Бујар Османи. Кога заедно ќе ги соберете имаат околу 300 илјади гласа. ВМРО-ДПМНЕ само, односно професорката Силјановска има 363 илјади гласа, според последните бројки од ДИК. Значи ВМРО-ДПМНЕ како што им кажа така и стори заедно со народот, ја порази Владата. Очигледно е дека има големо антивладино расположение. Тие на овој начин покажуваат дека не се државотворни партии, дека се водат од личен интерес. И мислам дека тоа ќе го препознаат граѓаните на 8 мај за време на вториот круг и на парламентарните избори, и ќе дојдеме до мнозинство во Парламентот како политичка опција и Коалиција „Твоја Македонија“ предводена од ВМРО ДПМНЕ, истакна тој.
Мицкоски ја искористи можноста да ја потсети македонската јавност дека двапати во минатото ВМРО –ДПМНЕ можела да се однесува незрело и неодговорно и да уценува, и во 2019 и во 2004 година, но како партија учествувала на тие избори, се борела до последно и била достоинствена и во поразот.
– Ние учествувавме на претседателските избори во 2019 година, се боревме до последно, бевме достоинствени во поразот и еве пет години се вративме и ги декласиравме. Истото тоа се случуваше и во 2004 година кога беа изборите, потоа следеше расколот во ВМРО-ДПМНЕ кога исто така имаше одредени структури во ВМРО-ДПМНЕ, сегашни коалициони партнери на Пендаровски и Ковачевски, кои повикуваа на бојкот, но тогашното раководство на партијата излезе, се бореше, загуби. Победи тогашниот кандидат на СДСМ , Бранко Црвенковски, но сепак останавме достојни. Партијата се врати посилна од било кога. Така се однесува државотворна одговорна партија, рече лидерот на ВМРО-ДПМНЕ.
Истовремено, тој ги повика граѓаните масовно, како никогаш досега да излезат на следните парламентарни избори и на вториот круг од претседателските избори, за да не се дозволи, како што рече, „типот на политичарите кои се дел од раководството на СДСМ и Али Ахмети, да ја уценуваат Македонија, а земјата да тоне во политичкото мочуриште што тие сакаат да наметнат.
-Никој не е посилен од граѓаните. Сега сите алатки се во нивни раце, граѓаните се тие кои одлучуваат за иднината на своите семејства и за иднината на Македонија. Од тоа што го видов изминативе 21 ден, убеден сум дека тие се обединети околу „Платформата 1198“ и околу потребата за промена. Така што, и покрај овие закани јас очекувам дека граѓаните масовно ќе излезат, дека Гордана Силјановска-Давкова ќе биде новиот претседател, а Коалицијата „Твоја Македонија“ и ВМРО ДПМНЕ, ќе ја формираат идната влада со сопствено мнозинство од 61 пратеник во Парламентот, рече Мицкоски.
