Матеус: Му верувам на Флик, Мусиала може да биде следниот Меси
Лотар Матеус е фудбалерот со најмногу настапи на светските првенства (25) на сите времиња. Легендата на Бундеслигата за „Марка“ ја коментира денешната пресметка со Шпанија против која Германија нема право на грешка.
– Мислам дека поразот од 0:6 во Лигата на нации во 2020 година од Шпанија нема да има никакво влијание. Јасно е дека поразот од Јапонија ја става Германија во многу тешка позиција и ќе мора да се бориме за секој метар од теренот – вели Матеус.
Денешниот дуел помеѓу двете квалитетни европски селекции на Мундијалот во Катар ќе се игра од 20.00 часот.
– Гави и Педри ќе бидат предводници на новата шпанска генерација. Луис Енрике им верува и мислам дека тоа е правилно. Крос направи неверојатни работи за репрезентацијата, но сега има некој да го замени. Ги имаме Гундоган и Мусиала, а исто така и Кимих и Горецка – рече Матеус.
Поранешниот германски репрезентативец верува во работата на селекторот Ханси Флик.
– Пред четири години не успеавме во Русија, но сега може да биде поинаку. Атмосферата во тимот не е идеална, но верувам во Ханси Флик бидејќи многу добро го познавам. Џамал Мусиала може да биде следниот Меси. Тој е одличен играч, а не ви го кажувам тоа затоа што е од Баерн. Тој е многу интелигентен и исклучителен професионалец – се зборовите на Матеус.