Култура
„Дискретниот шарм на македонскиот филм“ треба да се преведе на англиски јазик и да ја добијат гостите на филмските фестивали, порача Ана Опачиќ на промоцијата
Во опуштена атмосфера, во придружба на џез, се одржа промоцијата на книгата „Дискретниот шарм на македонскиот филм“ од Ана Василевска во „Јавна соба“.
Книгата, која е во издание на „Македоника“, е сублимиран приказ на состојбите во нашата кинематографија од осамостојувањето на Македонија до 2021 година, односно опфаќа три децении македонска продукција.
„Можеби сме мала кинематографија и оттаму тој наслов ‘Дискретниот шарм на македонскиот филм’, но многу значајна и веќе форматирана“, рече авторката Василевска додавајќи дека книгата вклучува мемории, новинарски опсервации, перспективи на речиси триесет години, во кои развојот на филмот во самостојна Македонија се поистоветува со нејзиниот личен и професионален развој.
Промоторката на книгата, Ана Опачиќ, направи интересна паралела на книгата со Амели Пулен.
„Кога ја добив книгата и ја отворив, се почувствував како филмската херојка Амели кога ја наоѓа малата метална кутија и во неа се сите спомени. Така и јас се чувствував – како да отворив кутија во која се сите спомени на Ана, кои ги собирала сите овие години. Сега кога веќе е објавена, таа не е само на Ана, туку е книга на сите нас што ќе ја имаме во нашите библиотеки и сметам дека сите луѓе што се занимаваат со култура би требало да ја имаат во својата домашна библиотека“, рече Опачиќ.
Таа апелира „Дискретниот шарм на македонскиот филм“ да биде преведена на англиски јазик, а гостите на филмските фестивали во земјата да ја добијат во рамките на настанот со цел да се запознаат со македонската кинематографиja.
Режисерот Дарјан Пејовски на промоцијата истакна дека многу филмови биле снимени во Македонија во изминатите три децении, па во време кога сме бомбардирани од информации, забораваме на тоа и токму затоа оваа книга има исклучителна важност.
Говорејќи за македонската кинематографија, Пејовски рече дека дека од 1991 до денес таа постојано лута, хистерична е и контрадикторна, но затоа бележи големи успеси, меѓу кои три номинации за „Оскар“ и учество на еминентни филмски фестивали, меѓу кои Венеција и Кан.
Ана Василевска, родена во Скопје 1975 година е новинар, филмски теоретичар, критичар. Формалното образование го стекнува на Филолошкиот факултет „Блаже Конески“ како дипломиран филолог по македонски јазик, со општа и компаративна книжевност, а магистерските студии по филмска и телевизиска режија на Факултетот за аудиовизуелна уметност ЕСРА, Скопје. Со професионално новинарство, насочено кон културата, со посебен фокус кон филмот, се занимава од 1998 година. Автор е на стотици објави на рецензии, осврти, интервјуа, анализи и критики поврзани со филмот, пласирани во многубројни печатени и електронски медиуми. Била уредник на ревијата за филм на првото електронско списание во Македонија, „Блесок“. Селектор и модератор на ревијалната програма „Мак поинт“ на ИФФК „Браќа Манаки“ во периодот од 2016 до 2019 година. Работела и како лице задолжено за односи со јавноста на мнофубројни филмски проекти во македонска продукција. Иницирала, организирала и модерирала низа тематски трибини за македонскиот филм. Уметнички координатор е на првата манифестација за преглед на годишната филмска продукција, „Златна рамка“, денови на македонскиот филм 2019 – 2023 година. Медиуми во кои работела: Македонската телевизија, „Дневник“, „Форум“, „Макфакс“, Радио Равел, „А1 он“, „Нова ТВ-веб“ и други. „Дискретниот шарм на македонскиот филм“ е нејзина прва објавена книга. По промоцијата, книгата ќе биде достапна во книжарниците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Музеите се огледало на минатото и на нашето културно наследство, порача министерката Костадиновска Стојчевска
Министерката за култура Бисера Костадиновска Стојчевска на сите музејски работници им го честита Меѓународниот ден на музеите – 18 Maj за кои вели дека се огледало на минатото и на нашето културно наследство.
„На 18 Mај, Меѓународниот ден на музеите ја нагласуваме нивната заштитничка улога на историјата, културата и македонскиот идентитет. Музеите се инспирација за креативност, истражување и критика, уникатни локации за интерпретација на уметноста, археологијата и науката. Со честитката до сите музејски работници ја нагласувам нивната посветеност во заштита на дејноста и придонесот за едукација на младите генерации во справувањето со комплексните општествени предизвици“, се вели во честитката.
Министерката за култура посочува дека денеска ја подигаме свеста и го насочуваме вниманието кон важноста на музејските институции со отворање на нивните врати за граѓаните.
Таа потенцира дека Министерството за култура поддржува голем број проекти на музеите во остварување на заедничката цел за достојно почитување и вреднување на културата и културното наследство.
„Музеи за едукација и истражување“ е мотото под кое денеска се одбележува Меѓународниот ден на музеите – 18 Мај, датум кој музејските институции низ светот со разновидни активности го одбележуваат од 1977 година.
На овој ден, музеите во земјава традиционално ги отворат своите врати и овозможуваат бесплатен влез за посетителите кои можат да ги видат актуелните изложби и да се запознаат со движното културно богатство.
Меѓународниот ден на музеите традиционално се одбележува секоја година на 18 мај со цел промоција на значењето на музејските институции во современото општество.
Култура
Лозано, Пајак, Сашко Коцев… денес во Градски парк како дел од кампањата „Крени глас против врсничко насилство“
Во рамки на кампањата на „Макпетрол“ за спречување на врсничкото насилство, во Градски парк денеска ќе се одржи отворен настан наменет за деца, млади, родители, баби, дедовци…
Диџеј Боно, Сашко Коцев, „Биби и Боби“, Лозано, Пајак, Весна Петрушевска со децата од нејзината актерска школа, како и други гости, ќе бидат дел од програмата на оваа забавна дружба што е дел од кампањата „Крени глас против врсничко насилство“, а за најмладите ќе има интерактивни содржини и популарни игри.
Марија Јосифовска-Спасовска, член на Управниот одбор и директор во „Макпетрол“, вели дека се пресреќни што во текот на нивната општествено одговорна активност добиле многу поддржувачи.
Почнувајќи од децата и младите, од кои добивме впечаток дека им е навистина мило што, конечно, така отворено и толку гласно, се зборува за проблем со којшто тие секојдневно се соочуваат. Секако, тука се и општините, кои ја препознаа вредноста на нашата идеја и активно се вклучија во обезбедувањето услови за учениците да се здобијат со знаења за булингот. Наставниците, стручните служби, како и родителите, исто така, застанаа зад кампањата и помогнаа фокусот на јавноста да се сврти кон врсничкото насилство. За да се реши проблемот со булингот потребна е уште работа и посветеност, но веруваме дека и со позитивната енергија од нашиот настан, ќе придонесеме да се придвижиме во вистинска насока, истакнува Јосифовска-Спасовска.
Како што информира организаторот, на кампањата „Крени глас против врсничко насилство“ досега се приклучиле 24 општини и за сите нив „Макпетрол“ обезбеди едукативни материјали и работилници предводени од психолог со долгогодишно искуство за проблемот со булингот.
Култура
Утре, бесплатен влез во музеите
„Музеи за едукација и истражување“ е мотото со кое утре ќе се одбележи Меѓународниот ден на музеите, 18 Мај, датум кој музејските институции во светот со разновидни активности го одбележуваат од 1977 година.
На овој ден музеите во земјата традиционално ги отворат своите врати и овозможуваат бесплатен влез за посетителите, кои може да ги видат актуелните изложби и да се запознаат со движното културно богатство.
Музеите, освен својот придонес како платформа за размена на идеи и знаења, имаат значајна улога во образованието и се афирматори на темите што денес силно го засегаат светот, а кои чекаат да бидат истражени и споделени.
Музејските институции ги поттикнуваат идните генерации на креативен, динамичен и интересен начин да се осврнат на комплексните општествени предизвици на денешницата, да се информираат за причините и последиците од човековото влијание врз природата и да развијат критичко размислување и лична одговорност неопходна за градење одржливо општество.
Меѓународниот ден на музеите традиционално се одбележува секоја година на 18 мај со цел промоција на значењето на музејските институции во современото општество. Денот посветен на музеите е урврден од Меѓународниот совет на музеите – ИКОМ, со седиште во Париз.