Официјалните резултати од ДИК ја потврдија големата предност на Силјановска

Кандидатот на ВМРО-ДПМНЕ Гордана Силјановска Давкова собра најголем број гласачи во првиот круг од претседателските избори. Според ДИК, доверба на Силјановска и дале 363.086 граѓани или 40 отсто од вкупниот број гласачи. Нејзиниот главен ривал, актуелниот претседател Стево Пендаровски, освои 180.500 или близу 20 отсто од вкупниот број. Силјановска и Пендаровски ќе се соочат во вториот изборен круг, каде граѓаните ќе гласаат за новиот шеф на државата.

Двајцата албански кандидати собраа вкупно над 200.000 гласови. За Бујар Османи од „Европски фронт“ гласаа 121.088 граѓани, додека за Арбен Таравари од коалицијата „Вреди“ 83.393 граѓани или 9,20 отсто од вкупниот број.

Над 130.000 гласови собраа кандидатите на другите македонски партии. Имено, за Максим Димитриевски од „ЗНАМ“ гласаа вкупно 83.856 граѓани или 9,26 отсто од вкупниот број гласачи, додека за Билјана Ванковска 41.331 граѓани или 4,56 отсто.

Најслаб резултат на овие избори постигна Стевчо Јакимовски од ГРОМ. Тој е единствениот кандидат кој освоил помалку гласови од собраните потписи за претседателската кандидатура. Имено, за него гласале само 8.121 гласачи или 0,90 отсто од вкупниот број.

Во првиот круг од седмите претседателски избори своето избирачко право го искористиле 904.892 граѓани или 49,95 отсто од вкупниот број. Вториот круг од претседателските избори се одржува на 8 мај заедно со редовните парламентарни избори.

Суад Бајрами