На настанот на кој Тошковски даваше изјави беше присутен и новинарот Фуркан Салиу кој го праша дали тој нападнал или спречил полицаец во вршење службено дејство. Како што објасни министерот, според службените белешки доставени од полицајците, а во кои тој имал увид, и согласно информациите од полицајците кои биле нападнати, Салиу нападнал службено лице. Според снимката што тој лично ја видел, Салиу спречил овластено службено лице во преземање одредени дејствија
Факт е дека вчерашниот фудбалски натпревар во Средно Коњари бил од висок ризик и поради тоа имало припадници на интервентната полиција и на ЕБР, факт е дека приведените лица имале физички контакт со полицајците и факт е дека кај приведениот новинар Фуркан Салиу е пронајдено оружје во возилото, изјави денеска министерот за внатрешни работи Панче Тошковски по работната посета на полициската станица во Шуто Оризари.
Тој беше дециден дека за целиот настан се обезбедени докази и снимки кои ќе бидат доставени до Основното јавно обвинителство при што ќе следува и соодветна пријава.
Тој истакна дека точно ќе биде утврдено кои се и од каде се навивачките групи кои вчера го предизвикале инцидентот.
„Од Фудбалската федерација е констатирано дека станува збор за натпревар од висок ризик, поради што се ангажирани полициски службеници во обем и вид какви што беа на самото место. Поради тоа, имаше луѓе од интервентна полиција, имаше луѓе од ЕБР. Фудбалскиот натпревар е прекинат затоа што настанал физички инцидент помеѓу две навивачки групи за кои точно ќе се утврди кои се, од каде се, тука има индиции за, најблаго да кажам, навивачки групи за кои е чудно зошто биле на ваков настан и тоа во детали ќе се разработува. Од страна на полициските службеници е интервенирано со цел да бидат раздвоени навивачките групи кои физички се пресметувале меѓу себе и од тој момент интервенира полицијата да ги раздвои“,
изјави Тошковски.
Според него, во физичката пресметка на навивачките групи било едно лице, кое потоа било приведено, кое во повеќе наврати физички напаѓало припадници на другата навивачка група, физички нападнало и еден овластен полициски службеник кој го соборил.
„По соборувањето на ова приведено лице околу полицискиот службеник се присутни и други припадници на ЕБР и интервентната полиција, при што во моментот на приведување на ова лице, кое ќе повторам во повеќе наврати физички удира и мава, како по припадници на друга навивачка група и исто така се бори со дел од полицајците, во моментот на приведување на ова лице друго лице кое исто така е приведено вчера, по она што можев да го констатирам на камерата, е во физички контакт со овластени полициски службеници при што се гледа како одзади му приоѓа на полицаецот и потоа друг полицаец се упатува кон него и го приведува, како што видовте на дел од снимката која излезе вчера, а се надевам јавноста ќе има можност детално да ги види снимките кои се прибавени од МВР. Откога се приведени овие две лица, приведено е уште едно лице односно се однесени во полициската станица во Гази Баба каде што е дадена изјава од лицата во врска со настанот“,
посочи Тошковски.
Исто така, додаде тој, факт е дека во возило во сопственост на еден од приведените е пронајдено огнено оружје – пиштол при преглед од страна на овластените службени лица, кој е со дозвола во однос на имателот, но таа дозвола во никој случај не може да амнестира прекршочно дело.
„Во овој дел таквото оружје во никој случај не може да биде во возило во рамки на селото Средно Коњаре. Точно се знае каде се носи оружје, како се транспортира од точка А до точка Б, дали се носи со полн или празен шаржер. Констатиран е прекршок во однос на начинот на поседување. Легалитетот на самото поседување е неспорен, спорен е начинот на користење. Ова не е начин на чување оружје“,
истакна министерот за внатрешни работи.
На настанот на кој Тошковски даваше изјави беше присутен и новинарот Фуркан Салиу кој го праша дали тој нападнал или спречил полицаец во вршење службено дејство.
Како што објасни министерот, според службените белешки доставени од полицајците, а во кои тој имал увид, и согласно информациите од полицајците кои биле нападнати, Салиу нападнал службено лице. Според снимката што тој лично ја видел, Салиу спречил овластено службено лице во преземање одредени дејствија.
„Не е важно што јас сум видел, јас не поднесувам кривична пријава ниту судам. Никој нема право да злоупотребува никаква позиција во ова општество, без разлика дали е новинар, доктор, адвокат или министер. Никој нема право да нападне службено лице и никој нема право да нападне новинар. И законот треба да важи за сите“,
нагласи Тошковски.
Тошковски го повика Салиу да биде искрен и да одговори дали имал физички контакт со полицаец, на што Салиу одговори: „Во ниту еден момент“.
По ова Тошковски му врати: „Лажете, господине Фуркан“.
На прашањето на Салиу зошто бил извршен претрес на неговото возило без негово присуство, Тошковски нагласи дека бил извршен преглед.
„Известен сум дека при извршен преглед на вашето возило е пронајден пиштол. Многу е битно пиштолот да го чувате дома, а не во возило и на спортски настан, да го користите согласно одредбите од законот“,
рече Тошковски.
Салиу го праша Тошковски што доколку се утврди дека тој не нападнал полицаец.
„Ќе ви се извинам лично, нормално, но тоа не го видов на камерите“,
истакна Тошковски.
Тој најави дека внатрешна контрола ќе ги испита сите дејствија и апелираше до јавноста да не подлегнува „на класичните манипулации кои беа пласирани од одредени политички партии“.
„Не беше приведен ниеден што не нападнал службено лице или, пак, не спречил службено лице во вршење на службата. За сите овие настани ќе има соодветни докази“,
нагласи тој.