Астон Вила започна со првични испитувања за можноста да го ангажира напаѓачот на Рома, Пауло Дибала. Англискиот клуб има сериозен интерес за aргентинецот и веќе стапил во контакт со неговиот агент за да ги направи првите чекори за евентуален трансфер на лето, пишува „Кориере дела Сера“.
Дибала има одлична сезона во Рома и е важен играч за тимот. Оваа сезона има 14 гола и седум асистенции на 28 натпревари. Сепак, неговиот договор е само до 2025 година, а има и скромна откупна клаузула од 13 милиони евра која лесно може да ја плати Астон Вила. Всушност, клубот од Бирмингем не е единствениот од Премиер Лигата заинтересиран за аргентинскиот репрезентативец. Него будно го следат и Њукасл и Челси.
Иако му е удобно во Рома, Дибала може да биде во искушение да испроба нов предизвик на крајот од кариерата.
Сега има 30 години и ова може да му биде последна шанса да си ја проба среќата во Премиер Лигата. Иако неговата цена не е особено висока, клубот кој сака да го привлече мора да му подготви прилично сериозна плата на аргентинецот, околу 8 милиони евра по сезона.