Сите сте слушнале за сексуална и емоционална измама, но има и друг тип, кој се покажал дека е уште позастапен, но и „поопасен“ од претходно споменатите.
Тоа е всушност „финансиска измама“. Не, не се работи за кражба на пари од партнерот, но не е ни толку далеку од тоа. Тоа е облик на однесување во врска или брак кој се манифестира во нечесност во однос на финансиската состојба. Поточно, станува збор за чин на прекумерно трошење и натрупување долгови без знаење на партнерот.
Овој облик на неверство вклучува секоја финансиска одлука која е донесена без консултација со партнерот и која има негативно влијание врз врската или финансиската стабилност на парот. Бројни студии покажаа дека финансиската измама е во пораст и се јавува кај парови од сите возрасти.
Според истражувањето спроведено во САД, дури 41 процент од Американците ги криеле своите долгови, празни сметки, позајмување пари и штетните навики за трошење од своите партнери.
Импулсивното тајно купување и непланираното трошење се меѓу најчестите финансиски проблеми со кои се соочуваат паровите. Кога ќе се открие вистината, доаѓа до сериозно нарушување на довербата меѓу партнерите, а страната од која се криеле проблемите со право се чувствува изневерена.
-Тешко е да се поверува дека некој може толку многу да ве лаже и дека некој за кој мислевте дека го разбирате и дека можете да го „прочитате“. Споровите поврзани со парите се потешки и траат подолго, вели Меган Мекој, професорка на Универзитетот во Канзас, специјализирана за финансиска терапија, нова форма на терапија која комбинира финансиско и семејно советување.
Навиките за трошење најчесто стануваат проблем кога парот ќе реши да направи голема инвестиција, како купување на нов автомобил или стан и во неочекувани кризни ситуации кога итно ни требаат пари. Токму тогаш на виделина излегуваат тајните на личноста која ја криела својата финансиска измама.