Од вкупно регистрирани 348 гласачи, во затворот во Шутка до пладне гласале околу 35 проценти или 121 затвореник. Денеска, покрај затворениците, гласаат и болни и немоќни луѓе, како и дијаспората
Екипа на „360 Степени“ беше во посета на истражниот затвор „Скопје“ во Шуто Оризари, каде што од утринава, од 7 часот, па се до 19 ч. тече гласањето за првиот круг од претседателските избори.
Под строги правила, кои подразбираат влегување без лични работи како ранци и мобилни телефони и со полициска придружба, се упативме кон просторијата која беше гласачко место за затворениците.
Пред да влеземе во затворското гласачко место, уште една полициска екипа повторно нè легитимира.
Внатре во просторијата, пак, пет претставници на избирачкиот одбор го спроведуваа гласањето. Преку внатрешен ходник, полициските стражари ги носеа затворениците еден по еден во просторијата на гласање.
Штом гласаа, веднаш ги враќаа во ќелиите.
Имаше и такви што дојдоа само усно да се изјаснат оти не сакаат да гласаат. Избирачкиот одбор им кажа дека доколку не сакаат да го остварат своето гласачко право нема потреба воопшто да ги известат за тоа.
Oд Избирачкиот одбор на ова гласачко место посочија дека гласањето се одвива без проблеми.
„Гласањето се отвори нормално, во седум часот наутро. Гласањето тече во најдобар ред, значи без никакви инциденти, без никакви проблеми. Се внимава да нема метеж на гласачкото место, значи, се гледа еден да гласа зад параванот во целосна приватност – без никакво вознемирување и излегува од просторијата, а потоа доаѓа следниот гласач“,
кажа за „360 Степени“, Александар Глигоров – потпретседател на Избирачкиот одбор.
Од вкупно регистрирани 348 гласачи, во затворот во Шутка до пладне гласале околу 35 проценти или 121 затвореник.
Инаку, денеска, покрај затворениците, гласаат и болните и немоќните лица, како и дијаспората.