Рано утринава Русија жестоко ја нападна Украина со проектили и дронови.
„На денот на сеќавањето и победата над нацизмот во Втората светска војна, нацистичкиот Путин изврши масовен ракетен напад врз Украина. Повеќе од 50 проектили и повеќе од 20 дронови Шахед беа истрелани врз инфраструктурата во Лавов, Виница, Киев, Полтава, Кировоград , Запорожје и Ивано-Франковск“, објави украинскиот претседател Володимир Зеленски на X.
„Сите служби за итни случаи излегоа на терен и веќе работат на ублажување на последиците од рускиот терор. Целиот свет мора да разбере кој е кој. Светот не смее да му даде шанса на новиот нацизам“, најави Зеленски.
Руските воздушни напади утринава првенствено беа насочени кон енергетската инфраструктура низ целата земја, соопштија украинските воени и енергетски претставници. „Уште еден масовен напад врз нашата енергетска индустрија! Украинскиот министер за енергетика Херман Халушенко објави на својот канал Телеграм.
Целите беа капацитети за производство и пренос на електрична енергија во Полтава, Кировоград, Запорожје, Лавов, Ивано-Франковск и Виничкиот регион, додаде тој. Освен регионот Запорожје, сите останати се далеку од линијата на фронтот, која минува низ источниот и југоисточниот дел на Украина.
Рускиот воздушен напад предизвика сериозни оштетувања на опремата во три термоцентрали, соопшти утринава ДТЕК, најголемата приватна украинска компанија за електрична енергија. „Опремата е сериозно оштетена“, соопшти DTEK на апликацијата за пораки Телеграм.
Во централниот регион Полтава, објект на енергетска инфраструктура беше погоден од напад со дрон, кој предизвика пожар, напиша на Телеграм регионалниот гувернер на Полтава, Филип Пронин. Според првичните информации нема повредени.
Гувернерите на регионите на Виница и Запорожје наведуваат дека се оштетени критични објекти од цивилната инфраструктура, не наведувајќи дополнителни детали.
Сите проектили насочени кон Киев се уништени, објави на Телеграм шефот на градската воена управа Серхиј Попко. Тој додаде дека во нападот нема поголема штета или повредени.
Очевидци на Ројтерс во Киев објавија дека слушнале експлозии, кои звучеле како системи за противвоздушна одбрана насочени кон воздушни цели.
Системите за противвоздушна одбрана беа ангажирани и во одбивањето на рускиот напад над регионот Лавов, кој се граничи со Полска, членка на НАТО, каде што одекнаа неколку експлозии, соопштија регионалните власти.
Русија, која започна сеопфатна инвазија на Украина во февруари 2022 година, започна серија напади врз украинските електроенергетски постројки во последниве месеци. Москва негира дека цели на цивили, но вели дека енергетскиот систем на Украина е легитимна воена цел.