Шпанската модна компанија „Mango“ во понеделникот објави рекордна продажба од 3,1 милијарди евра за 2023-та година, надминувајќи ја својата прогноза, бидејќи успеа да одговори на силната експанзија на локалниот ривал „Zara“ во САД.
Брендот со седиште во Барселона објави дека неговата продажба скокнала за 19% минатата година, надминувајќи ја прогнозата од 3 милијарди евра. Силниот раст беше помогнат од фокусирањето на облеката за специјални пригоди и повеќе луксузна облека, која е помалку чувствителна на повисоки цени.
Тоа помогна да се спречи притисокот од брзиот раст и подобрите цени на онлајн играчите како што е кинескиот „Shein“.
„Mango“ се позиционира како премиум играч и има повисоки цени од „Zara“ на „Inditex“ и шведскиот „H&M“ за облека за специјални прилики, објави фирмата за малопродажни податоци „EDITED“.
Најголемите зголемувања на цените се за фустаните, каде што просечните цени се зголемени за 46% за колекцијата пролет 2024-та година во споредба со пред две години на пазари како САД, соопшти „EDITED“.
„Многу производи не поскапеа, но ценовниот микс на нашата колекција се зголеми“, вели извршниот директор на „Mango“, Тони Руиз, додавајќи дека компанијата го намалила бројот на производи со попуст.
Нето добивката на „Mango“ се зголеми на 172,1 милиони евра од 81 милион евра во 2022-ра година, изјави Руиз на прес-конференција. Бруто маржата е зголемена за речиси 60% во 2023-та година, а компанијата нема нето долг, додаваат од „Mango“.
Семејната модна марка ги следи стапките на најголемата јавно тргувана модна компанија во светот, „Inditex“, која исто така се шири во САД.
Руиз рече дека компанијата планира да отвори уште 30 продавници во САД и да го направи тој пазар трет по големина до 2026-та година, како дел од планот за отворање на 500 нови продавници ширум светот во следните две години. Така, вкупниот број на продавници ќе достигне 2.700.
Компанијата минатата година инвестираше 187 милиони долари, главно во нови продавници и логистички центри.
Околу 20 од 130-те продавници на „Mango“ отворени минатата година беа во САД, каде што го започна своето проширување во 2022-ра година.
Компанијата цели на вкупна годишна продажба од 4 милијарди евра и двојна нето добивка до 2026-та година како резултат на проширувањето, рече Руиз.
Тој додаде дека „Mango“ не планира да ги пласира своите акции на берзата и нема потреба од нови инвеститори за собирање средства за нејзино проширување, за што до 2026-та година ќе бидат потребни инвестиции од 600 милиони евра.
Сепак, компанијата претрпува внатрешна реорганизација, создавајќи нов одбор на директори предводен од основачот Исак Андич. Руиз минатата година се стекна со 5% од акциите во компанијата.
