СДСМ утрово соопшти дека го прифаќа исходот од првиот круг на претседателските избори, но дека конечниот победник на изборите се уште не е одлучен. Од партијата нагласуваат дека ќе продолжат да се борат за секој граѓанин, за прогресивна и европска иднина на Македонија.
„Со десничарите може да се соочиме со мрачни сценарија од минатото, кои ќе стават крај на европските перспективи и кои водат во нова долга изолација и нови поделби во општеството. Веќе се гледа дека ВМРО-ДПМНЕ и ДУИ играат опасна игра со мултиетничкото ткиво на нашето општество. Тензиите што се сега се прават меѓу Македонците и Албанците може да нè вратат назад во грдото минато“, стои во соопштението од партијата на Димитар Ковачевски.
Лидерот на партијата најави дека нема да се откажат од победа на парламентарните избори.
„Сакам да ве поттикнам да разговарате со секој ваш пријател, роднина, сосед, до 8 мај, да кажете дека ДА, разбравме каде сме грешеле, дека имаме јасна програма и план како сето тоа да го поправиме и исто така да кажете дека ние сме таа партија која ги обезбеди сите овие прогресивни работи за државата и кои ја ослободија државата од канџите на само една политичка партија која имаше се во свои раце во цела една декада“, рече вчера Ковачевски од Чучер Сандево.