Пред три дена Град Скопје поништил дел од тендерот за прскање против комарци. На Електронскиот систем за јавни набавки е објавен официјален документ со информација дека се поништуваат два дела од тендерот за превентивна дезинсекција против возрасни форми на комарци и против ларви од комарци.
Како причина за поништување на постапката е наведено дека не е поднесена ниту една понуда или ниту една прифатлива понуда.
Според неофицијални информации до кои дојде Телма, станува збор за поништување на делот кој се однесува на прскањето против комарци од земја и делот за средствата за прскање.
Нема измени во делот за прскање од воздух.
Од Центарот за јавно здравје – Скопје велат дека сѐ уште не доцна, но набрзо ќе дојде периодот кога комарците ќе бидат размножени и ќе нема што да се направи во таа ситуација.
„Јас сепак мислам дека со оглед на временските услови ние сѐ уште имаме време за извршување на прскање од земја затоа што времето е нестабилно, има врнежи и таквите се најавите и за во следниот викенд. Меѓутоа, после тоа се надевам дека времето ќе се стабилизира и неколку дена ако има високи температури, отприлика 5-6 дена тогаш веќе треба да се аплицира ларвицидната, да се третираат водите. Така што, ние сѐ уште имаме време за третирање комарци, вели Д-р Николина Соколовска – Раководител во одделението за дезинфекција, дезинсекција и дератизација при ЦЈЗ – Скопје.“
Телма се обиде да добие детали од Град Скопје, но засега нема одговор, што стана пракса при комуникацијата на градската власт со медиумите.
Во меѓувреме, градоначалничката Арсовска е ангажирана во кампањата за парламентарните избори.
Петар Догов