Од следната недела ќе бидат ставени на полиграф вработените во оваа државна институција во Македонија

Агенцијата за национална безбедност ќе почнува со користење на полиграфско тестирање на своите вработени.

Полиграфот бил законска обврска уште кога е формирана агенцијата но никогаш не е спроведен. Полиграфот ќе се користи за постојните и за новите вработувања во АНБ, а проверки на вработените ќе се прават и по пријава од страна на граѓани за неправилно работење.

Доколку вработените одбијат или не поминат полиграфско тестирање тогаш нема да добијат безбедносен сертификат. Засега АНБ ќе го користи полиграфот на МВР на кој ќе работи човек од агенцијата. Директорот на агенцијата Бојан Христовски претходно најави дека ќе го стави полиграфот во функција, а денеска од АНБ само велат дека повеќе детали за темата ќе соопштат наскоро. Дел безбедносните експерти велат дека законската обврска за ставањето на полиграфот во функција е добра, но велат дека треба да се внимава на професионализацијата на безбедносните служби.

Дел од луѓето кои учествуваа во креирањето на АНБ објаснуваат дека законската обврска за полиграфско тестирање на вработените не била направена од технички причини. Тогаш како и сега на располагање бил ограничен број на уреди и нивни оператори, при што било речиси невозможно во законски предвидениот рок од 40 дена за примање на вработените да се поминат сите на полиграф.

Дополнително проблем е доколку тестирањето на вработените во АНБ ги прави вработен од МВР бидејќи се работи за луѓе со безбедносни сертификати, затоа сега на полиграфот ќе работи човек од агенцијата.