Повеќе од 140 лица се повредени и 115 загинаа откако вооружени напаѓачи отворија оган на концерт во Крокус, предградие на Москва вчера, соопштија руските разузнавачи.
Напаѓачите употребиле запалива течност за да запалат делови од концертната сала и при нападот биле облечени во воени униформи.
11 лица се уапсени а 4 од нив биле директно вклучени во нападот, јавува Би-би-си.
Безбедноста е зајакната низ Русија, а настаните се откажани бидејќи националната гарда ги бара напаѓачите и ги испраќа своите истражители на местото.
Итните служби работат на расчистување на урнатините, запленување докази и прегледување на снимките од видео надзор.
Инаку, Американската амбасада во Русија пред две недели, на 7 март, издаде безбедносно предупредување до граѓаните на САД, барајќи од нив „да избегнуваат големи собири во следните 48 часа“.
Амбасадата, исто така, соопшти дека „ги следи извештаите дека екстремистите имаат непосредни планови за напад на големи собири во Москва, вклучително и концерти“.
