Германија: Последно ТВ-соочување на партиите пред изборите

Ако сите зборуваат одеднаш - станува тешко. Тогаш веќе никој ништо не разбира, а такви моменти имаше во изобилство синоќа - за време на „финалната рунда“ од  изборната кампања  на претставници на политичките партии на ТВ соочувањето во студио на јавните телевизиски сервиси АРД и ЗДФ. Беа поканети осум партии, а дебатата на моменти стана лична и вжештена.

А имаше изненадувања:  Алис Вајдел  од АфД зборуваше за задолжителниот воен рок, кој нејзината партија сака повторно да го воведе. Но, ново е тоа што младите мажи според неа треба да служат две години во Бундесверот.

Овој пат се дискутираше за теми кои инаку беа запоставени: здравство, нега и заштита на климата. Унијата го нарече фијаско законот за греење на владата. Што се однесува до негата, СПД повика сумата на лична партиципација во трошоците за згрижување во домовите да биде ограничена на 1.000 евра. А ФДП го критикуваше фактот дека сите други сакаат да трошат премногу пари.

Политичарите под посебна опсервација

Тоа беше телевизиски маратон во рекордно време - во оваа изборна кампања во која сè требаше да се случи забрзано. Тука сè може да биде важно: пропуст, погрешен збор, смеење на погрешно место. Политичарите се под посебна лупа за време на  изборните кампањи.

„Овој пат телевизиската изборна кампања беше поинтензивна од кога било“, вели политикологот Сабине Кроп од Слободниот универзитет во Берлин. Бидејќи емисиите траеја многу долго - до два часа -  гласачите имаа можност  да се информираат и за личните карактеристики на кандидатите. „Како што се кредибилитетот, лидерската способност, непоколебливоста. Или за нивниот личен,  допадлив или несимпатичен настап".

Дискусии пред милиони гледачи

Олаф Шолц, Фридрих Мерц,  Роберт Хабек,  Алис Вајдел, Кристијан Линднер, Јан ван Акен, Сара Вагенкнехт и сите други разговараа меѓу себе многу часови - пред милионска публика. Агресивниот канцелар праша: „Зошто треба да бидеш толку глупав?“ Предизвикувачот од ЦДУ, Фридрих Мерц, го обвини Олаф Шолц дека живее во „замок од бајките“. Роберт Хабек  од Зелените,  се жалеше на лошото расположение, а лидерката на АфД,  Алис Вајдел, сите ги критикуваше.

Гледачите можеа да го видат канцеларот Олаф Шолц   од СПД  кој многумина веќе го отпишаа, но кој сепак можеше делумно да поентира. И кој понекогаш се согласуваше со неговиот предизвикувач од ЦДУ, Фридрих Мерц. Дури и ако спорот за време на изборната кампања се разгоруваше повторно и повторно. Шолц го обвини Мерц дека го прекршил зборот и бара мнозинство со АфД. Лидерот  на ЦДУ  го отфрли ова.

Колку повеќе учесници, толку повеќе има емоции

Кога двајца се расправаат, третиот користи. Лидерката на АфД, Алис Вајдел, зборуваше за фактот дека нејзината партија има пријатели на Запад и Исток. Таа мисли на Русија, Украина и Кина. „За Германија би било подобро да биде неутрален посредник“, рече Вајдел. А Мерц одговори: „Не, госпоѓо Вајдел. Ние не сме неутрални. Не сме помеѓу. Ние сме на страната на Украина“. Тоа беше, исто така, момент во кој стана јасно дека од една страна стојат Унијата,  СПД и Зелените и прилично се согласуваат и покрај сите спорови- а од друга страна е АфД.

За ова зборуваа и емоциите. Колку е поголем кругот на учесниците, толку се емоциите позовриени.-  Алис Вајдел се пожали кога ја нарекоа „нацист“.

Линднер се пожали, свирежи против Вајдел

Претседателот  на ФДП,  Кристијан Линднер, забележа дека треба да е дозволено и одредено укажување, и се пожали на премалото време за емитување на ЗДФ за неговата партија. ФДП беше застапена таму само во групата на помалите партии. Модераторката му го посочи ова: со четири проценти, ФДП спаѓа во малите.

Сцена која отпосле беше често повторувана и споделувана по социјалните медиуми. Како и онаа на лидерката на АфД, Вајдел, која реагираше луто на критичкото прашање од менаџер на старечки дом во дебатна емисија на ЗДФ: „Имам впечаток дека не ме слушавте, дека не сте ја прочитале нашата изборна програма. И дека напамет сте го научиле тоа што сега го зборувате“. Следуваа свирежи и потсмев од публиката.

Изборната кампања беше тешка, понекогаш лична

Беше потребна емпатија, како што резимира политикологот Кроп. Дополнително, прашањата како што се домувањето, образованието и пензиите беа вратени во предизборната кампања во програмите со публика. „Исто така, стана јасно дека публиката само делумно верува во изборните ветувања, од кои некои беа сеопфатни - односно беа пореални од самите кампањи."

Изборната кампања беше тешка, понекогаш лична. Имаше жестоки расправии, но понекогаш имаше и смеа. Во „ТВ Квадрилот“ на ТВ РТЛ, канцеларот беше особено задоволен кога точно одговори на прашање од модераторот Гинтер Јаух, поставено како во квиз-шоуто „Кој сака да биде милионер“ - затоа што Олаф Шолц не сака ништо повеќе од тоа да оди во следниот круг. Дознавме на пример дека Шолц наводно е подобро прифатен кај младите жени од Мерц. Тој, пак, призна дека повеќе би сакал да остане во опозиција со децении отколку да оди во риалити шоуто „Кампот во џунглата".

Сите тие повторно ќе се видат на изборната вечер на телевизија. А канцеларот Шолц и предизвикувачот Мерц веќе се согласуваат за една точка. И двајцата сметаат дека е релативно малку веројатно дека ќе завршат заедно во влада - резимира Мерц. И Шолц се согласи: „Каде што е во право, тој е во право“.

Автор: Габор Халаж, АРД